Chelsea po studion mundësinë për nënshkrimin me Sadio Mane këtë verë.

Sulmuesi senegalez, sipas të gjitha gjasave, nuk do të qëndrojë në Mynih pas përfundimit të sezonit.

Grushtet që i dha Leroy Sanesë dhe mbi të gjitha paga e lartë 20 milionë euro në sezon i kanë mbyllur të gjitha shtigjet për vijimin te gjigantët e Bundesligës.

Mane u largua nga Liverpooli verën e kaluar për t’u bashkuar me kampionët e Bundesligës.

Fillimi ishte pozitiv në Gjermani, duke shënuar 11 gola në 23 paraqitjet e tij të para për klubin.

Megjithatë, Mane pësoi një dëmtim në nëntor, i cili e mbajti atë jashtë fushës deri në shkurt, dhe që nga kthimi ai ka luftuar për të rifituar formën e tij, duke shënuar vetëm një gol në 11 paraqitje në të gjitha garat.

Ka gjithashtu zëra se trajneri i ri i Bayernit, Thomas Tuchel, nuk e ka me sy të mirë.

Situata u përkeqësua kur Mane u përfshi në një grindje në dhomën e zhveshjes me shokun e skuadrës së Bayernit, Leroy Sane, pas humbjes në Champions League përballë Manchester City-t.

Chelsea sheh me afrimin e Manesë zgjidhjen e problemeve kryesore në sulm, pasi ai mund të luajë në disa pozicione në fazën e avancuar.

Bayern thuhet se dëshiron të rikuperojë shumën 27 milionë stërlina plus shtesat që i pagoi Liverpoolit për shërbimet e Manesë.

Përvoja e Manesë në Premier League (ka shënuar 111 gola dhe ka dhënë 47 asistime në 263 paraqitje për Southamptonin dhe Liverpoolin) është një bonus i madh për të firmosur me ekipet angleze.