Me padurim të madh, pjesa më e madhe e botës e pret Botërorin në Katar, i cili do të fillojë me ndeshjen e sotme mes vendasve dhe Ekuadorit dhe do të zgjasë deri më 18 dhjetor, kur simbolikisht është Dita Kombëtare e vendit pritës.

Kjo do të jetë Kupa e Botës e parë që do të mbahet në botën arabe dhe e dyta që do të mbahet tërësisht në Azi pas Kupës së Botës 2002 në Korenë e Jugut dhe Japoni. Njëkohësisht ky do të jetë turneu i fundit në të cilin do të marrin pjesë 32 skuadra, pasi në kampionatin e vitit 2026 në SHBA, Meksikë dhe Kanada do të luajnë 48 kombëtare.

Botërori i këtij viti do të mbahet për herë të parë në dimër për shkak të vapës në Katar dhe do të luhet në një hark kohor të shkurtuar prej 29 ditësh. Ashtu siç pritej, kjo krijoi shumë probleme për klubet e futbollit, ndaj ligat kombëtare u detyruan të zgjasnin pushimet dimërore në oraret e tyre, ndërsa garat e mëdha evropiane tashmë kanë përfunduar me ritme të vrullshme fazën e grupeve dhe pritet të vazhdojnë vetëm vitin e ardhshëm.

Në prill të këtij viti, Federata Botërore e Futbollit (FIFA) shpalli çmimet për të gjitha ekipet pjesëmarrëse. Çdo skuadër do të marrë 1.5 milionë dollarë përpara konkursit për të mbuluar kostot e përgatitjes. Fondi total i çmimeve do të jetë 40 milionë dollarë më shumë se fondi i kampionatit të mëparshëm. Kampioni i ri i botës në fund do të fitojë 42 milionë dollarë.

Polemikat e para për pritjen e Katarit filluan në vitin 2010, kur vendi arab mori mbështetjen e drejtuesve të FIFA-s në konkurrencë me Shtetet e Bashkuara të Amerikës, Korenë e Jugut, Japoninë dhe Australinë. Vendimi për të pritur Kupën e Botës në Katar u vlerësua si një rrezik i lartë operacional dhe mori kritika nga publiku. Shumë e kritikuan atë si pjesë e skandaleve korruptive në FIFA.

Ndërkohë, Katari u përball gjithashtu me kritika të forta për trajtimin e punëtorëve të huaj të përfshirë në përgatitjet e Kupës së Botës, dhe Amnesty International shkroi për punën e detyruar dhe kushtet e këqija të punës, ndërsa shumë punëtorë migrantë pretenduan se duhej të paguanin tarifa të larta për të gjetur një punë. Për shkak të ligjeve të Katarit për konsumimin e alkoolit, organizatorët kanë njoftuar krijimin e zonave të caktuara si një alternativë për tifozët. Një tronditje e veçantë për tifozët erdhi të premten, 48 orë para hapjes së kampionatit, kur nikoqirët vendosën të mos shesin alkool në stadium dhe në zonat e tifozëve që ndodhen brenda stadiumit.

Megjithatë, mikpritësit u përpoqën që kushtet për futbollistët të ishin në nivelin më të lartë të mundshëm, sidomos kur bëhet fjalë për stadiume që janë të pajisura me sisteme ftohjeje që synojnë të ulin temperaturën brenda stadiumit në 20 gradë Celsius. Stadiumi më i madh Lusai Iconic mban 80,000 spektatorë, Al Bayt 60,000, ndërsa gjashtë stadiumet e mbetura mbajnë 40,000 spektatorë (Stadiumi 974, Al Thumama, Halifa International, Education City, Ahmad bin Ali dhe Al Janoub).

Ceremonia e hapjes do të zhvillohet sot në stadiumin Al Bayt në Al Khor para ndeshjes mes Katar pritës dhe Ekuadorit. Këngëtari i BTS Jung Kook dhe grupi amerikan Black Eyed Peas do të performojnë në ceremoni. Do të performojë edhe këngëtari anglez Robbie Williams. Edhe pse u spekulua, Dua Lipa dhe Shakira nuk do të performojnë në ceremoninë e hapjes.

Totali kushton 200 miliardë dollarë

Shpenzimet e plota të organizimit të Botërorit do të arrijnë në 200 miliardë dollarë, duke e bërë atë Botërorin më të shtrenjtë në histori. Kjo është rreth 20 herë më shumë se kostoja e Kupës së Botës së mëparshme të mbajtur në Rusi katër vjet më parë.

Stadiumet e reja me kushtojnë më shumë se 7 miliardë dollarë, ndërsa sistemi i metrosë që lidh pesë nga tetë stadiumet kushton rreth 36 miliardë dollarë. Shpenzimet e zgjerimit të Aeroportit Ndërkombëtar të Hamadit, ku kapaciteti u rrit nga 40 në 58 milionë pasagjerë në vit, arritën gjithashtu në disa miliardë dollarë. U ndërtuan rrugë, hotele, salla...

Me vetëm 2.8 milionë banorë, Katari është një nga vendet më të pasura në botë dhe një pjesë e madhe e kostove të infrastrukturës që i atribuohen Kupës së Botës është pjesë e planit më të gjerë të zhvillimit të vendit deri në vitin 2030. Megjithatë, grupet e të drejtave të njeriut po i bëjnë ende presion FIFA-s dhe Katarit për të kompensuar numrin e punëtorëve që kanë vdekur ose janë plagosur gjatë “furisë” së ndërtimit që nga dhënia e turneut në vitin 2010. Katari shpreson të tërheqë më shumë se 1.2 milionë tifozë të huaj gjatë turneut dhe pret të fitojë 20 miliardë dollarë nga vendi pritës.

Brazili dhe Argjentina janë favoritët kryesorë

Favoriti i parë i turneut sipas ekspertëve, publikut dhe basteshkruesve është Brazili. Një ekip yjesh super të talentuar të mbledhur rreth lojtarëve të mëdhenj sulmues si Vinicius Junior, Rodrygo, Neymar apo Gabriel Jesus garantojnë cilësi në sulm, ndërsa Thiago Silva si kapiten do të udhëheqë mbrojtjen e përzgjedhjes që mban rekordin për numrin e trofeve të fituar në Kupën e Botës. Pranë Brazilit është rivali i tyre në Amerikën e Jugut, Argjentina. Të gjithë sytë e botës në turne do të jenë te Lionel Messi, i cili do të udhëheqë Argjentinën në atë që ka të ngjarë të jetë përpjekja e tij e fundit për të fituar titullin më të madh dhe të vetëm që i mungon karrierës së tij të pasur.

Kampionia aktuale Franca shkon në mbrojtjen e titullit e dobësuar pasi mbeti pa disa lojtarë kyç nga Rusia, por ende ka një skuadër të shkëlqyer të drejtuar nga Kylian Mbappe. Anglia dhe Spanja llogariten tradicionalisht ndër favoritët. Anglezët thuajse fituan Europianin vitin e kaluar dhe mbërritën në Katar me shumë optimizëm, ndërsa Spanja e ngarkuar me yje të rinj, ka ndërruar me sukses brezat dhe është gati për sukseset më të mëdha sërish.

Ndër kandidatët e mundshëm për të fituar titullin janë edhe Gjermania dhe Holanda. Pritet shumë nga Portugalia, e cila me gjasë do të drejtohet nga Cristiano Ronaldo për herë të fundit. Treni i fundit është edhe për brezin e artë të Belgjikës dhe pritet shumë nga Danimarka si një përzgjedhje që ka skuadër tejet cilësore dhe kimi të mirë brenda skuadrës.

Nënkampionja aktuale e botës, Kroacia nuk është sërish ndër favoritët kryesorë të basteshkruesve, ashtu si në Rusi në vitin 2018. Megjithatë, Kroacia sigurisht që ka një ekip që do t'i shkaktojë dhimbje koke edhe më të mirëve dhe kalimi në fazën e grupeve duket më se i mundshëm.

Gjithçka është gati për spektaklin e shekullit, të cilin do të mund ta shikojmë edhe në Shqipëri.