Sebastian Vettel do të ketë një tjetër fundjavë të veçantë, këtë herë në pistën tradicionale të Monzas, që pret Formula 1 .

Pikërisht në pistën e Italisë, ish-ferraristi, i cili aktualisht garon për Aston Martin arriti fitoren e parë, në vitin 2008, kur mbronte Toro Rosson, dhe katër herë kampioni i Botës pranoi se do të jetë një emocion ndryshe, pasi do të jetë hera e fundit në karrierë që do të garojë në Monza.

Në prag të Çmimit të Madh të Italisë, në konferencën tradicionale për shtyp, piloti gjerman, ndër të tjera, deklaroi: “Monza ka qenë gjithnjë speciale dhe do të jetë hera ime e fundit që garoj këtu, kështu që do të përpiqem që të shijoj në maksimum, pasi do të jetë një emocion ndryshe.

Në Monza kam fituar në të shkuarën dhe ruaj kujtime shumë të bukura nga cirkuiti”, deklaroi Sebastian Vettel.