Pyetjet mbi të ardhmen dhe mbi një shkarkim të mundshëm të tij në fund të edicionit eliminator, kanë nervozuar jo pak trajnerin Bernard Challandes, i cili ka reaguar ashpër ndaj gazetarëve në konferencën për shtyp para ndeshjes me Gjeorgjinë.
Challandes deklaroi se nuk është dramë një humbje në Spanjë dhe se skuadra ka punuar mirë e është rritur ndjeshëm në vitet e fundit, teksa ka sjellë në vëmendje se bëhet fjalë për një përfaqësuese të re.
“Në Suedi nuk bëmë një ndeshje të mirë dhe u ndëshkuam nga disa gabime tonat, të cilat i kemi evidentuar dhe do të punojmë që të mos i përsëritim. Unë nuk shoh asnjë problem për humbjen në Suedi, pasi atje u mposht edhe Spanja. Kosova është një përfaqësuese e re, që është rritur ndjeshëm në vitet e fundit. Sigurisht që ne mund të marrim rezultat të mirë edhe ndaj skuadrave si Suedia, Sllovenia, Spanja, Greqia, etj., megjithatë nëse nuk ia dalim, nuk shoh asnjë dramë”, deklaroi trajneri.
I pyetur mbi mundësinë e dorëheqje, tekniku zviceran u shmang me diplomaci, por la të kuptohet se eksperienca e tij te Kosova është drejt fundit dhe bëri thirrje që skuadra të mbështetet më shumë nga media.
“Një trajner nga ndeshja në ndeshje mbijeton dhe nuk e di nëse do të vijojmë bashkëpunimin apo jo. Nuk mund të flas sot për dorëheqje, apo për shkarkim, pasi këtë e vendosin të tjerët. Unë jam këtu prej tre vitesh e gjysmë dhe jam gati të vijoj punën e nisur, por nuk është momenti për të folur për të ardhmen. Ndalni kritikat dhe ndihmoni Kosovën. E ardhmja e saj do të jetë shumë e mirë edhe pa mua në stol, por ndihmojeni”, deklaroi tekniku zviceran.
© SYRI.net
Bëje LIKE dhe merr lajmin e fundit nga Sporti: