Presidenti i FIFA-s Xhani Infantino ka folur për temat më të nxehta që ndikojnë në futbollin aktual, që nga botërori i zgjeruar deri te sistemi i videoarbitrimit (VAR).

Zvicerani, që po përballet me oponencë të fortë për të rigjallëruar botërorin e klubeve, e për një Ligë Kampionësh globale, do të kërkojë të bindë Komitetin Ekzekutiv në 15 Mars.

“Të flasim për luftë është absurditet, por e vërteta është se kemi shumë divergjenca mbi disa tema të caktuara. Si president i FIFA-s duhet të përfshij të gjithë dhe me pak vullnet të mirë, gjendet rruga. Por në të kundërt jeta vazhdon, mandati im është botëror dhe jo europian”, tha Infantino.

Muajin e ardhshëm në këshillin e FIFA-s në SHBA, do të hidhet më shumë dritë mbi turnetë që kërkon të reformojë Infantino, ku me interes pritet diskutimi mbi një botëror me 48 skuadra.

“Duhet të marrim vendime të rëndësishme, si botërori me 48 kombëtare, që u votua në mënyrë unanime. Do të ishte mëkat që UEFA të mos përfshijë klubet dhe kombëtaret e saj. Nuk duhet të shtrohet çështja kështu. Kemi 211 anëtarë të FIFA-s dhe unë duhet t’i dëgjoj të gjithë. Kam të drejtën të përmirësoj një botëror klubesh, që nuk është si duhet. Nuk duhet ta fitojnë 7/8 skuadra europiane, por të jenë 40 ekipe nga e gjithë bota me këtë shans”, tha kreu i FIFA-s.

Infantino e cilësoi sistemin e videoarbitrimit (VAR) një sukses, pavarësisht disa episodeve, dhe këtë po e tregon edhe aplikimi i tij në Champions League.