Mbi 40 milionë njerëz në SHBA jetojnë me diabet dhe, sipas Qendrave për Kontrollin dhe Parandalimin e Sëmundjeve (CDC), rreth 11 milionë të tjerë mund ta kenë sëmundjen pa e ditur. Shumica e rasteve janë diabet i tipit 2, i cili shfaqet kur organizmi nuk prodhon mjaftueshëm insulinë ose nuk e përdor atë siç duhet, duke bërë që niveli i sheqerit në gjak të rritet.

Ekspertët paralajmërojnë se shumë simptoma të hershme shpesh injorohen, megjithëse diagnostikimi i hershëm mund të parandalojë komplikacione serioze.

1. Probleme me këmbët

Mpirja, ndjesia e djegies, shpimi me gjilpëra, lëkura e thatë, plagët që shërohen ngadalë ose ndryshimet në ngjyrën e këmbëve mund të jenë shenja të para të diabetit. Sipas podiatritdr. MikelDaniels, këto simptoma shpesh i atribuohen këpucëve ose lodhjes, por mund të tregojnë se sheqeri i lartë në gjak ka filluar të dëmtojë nervat dhe enët e gjakut.

2. Lodhje e vazhdueshme

Kur qelizat nuk arrijnë të përdorin glukozën si burim energjie, njeriu ndihet vazhdimisht i lodhur, edhe pas ngrënies. Dr. Jody-AnnMcLean thotë se kjo lodhje shpesh ngatërrohet me stresin ose moshën. Ndërsa dr. Kyle Hoedebecke shton se vështirësia për t'u përqendruar, përgjumja pas vakteve ose ulja e aftësisë për të kryer aktivitetet e përditshme mund të jenë shenja të diabetit të tipit 2.

3. Probleme seksuale

Diabeti mund të dëmtojë enët e gjakut dhe nervat, duke shkaktuar mosfunksionim erektil, probleme me ejakulimin ose ulje të ndjeshmërisë gjenitale. Këto ndryshime zhvillohen gradualisht dhe shpesh konsiderohen gabimisht si pjesë normale e plakjes, megjithëse mund të trajtohen nëse zbulohen në kohë.

4. Ndryshime në lëkurë dhe trup

Nivelet e larta të insulinës mund të shkaktojnë njolla të errëta në lëkurë, formimin e fibromave të vogla të lëkurës dhe grumbullim dhjami rreth barkut. Këto ndryshime shpesh ngatërrohen me procesin normal të plakjes ose me simptomat e perimenopauzës, por mund të jenë shenja të hershme të një çrregullimi metabolik.

5. Shikim i turbullt

Luhatjet ose rritja e vazhdueshme e sheqerit në gjak mund të shkaktojnë turbullim të shikimit. Në afat të gjatë, diabeti mund të dëmtojë enët e vogla të gjakut në retinë, duke shkaktuar retinopati diabetike. Shumë njerëz mendojnë se u duhen syze të reja, kur në fakt problemi lidhet me nivelin e sheqerit në gjak.

Ekspertët këshillojnë që këto shenja të mos injorohen. Nëse shfaqen një ose disa prej tyre, është e rëndësishme të bëhen kontrolle mjekësore dhe analiza të sheqerit në gjak, pasi diagnostikimi i hershëm mund të ndihmojë në parandalimin e komplikacioneve serioze të diabetit./TalkerNews