Depresioni pas lindjes nuk prek vetëm nënat. Studimet tregojnë se edhe baballarët mund të përballen me ankth, stres dhe depresion pas ardhjes në jetë të fëmijës, por simptomat e tyre shpesh janë më pak të dukshme dhe diagnostikohen më rrallë.

Prej kohësh dihet se nënat e reja mund të përjetojnë trishtim të thellë, ankth, stres dhe vështirësi emocionale pas lindjes.

Megjithatë, ekspertët paralajmërojnë se edhe baballarët mund të zhvillojnë depresion pas lindjes, ndonëse gjendja te burrat shpesh shfaqet ndryshe dhe për këtë arsye mbetet pa u diagnostikuar.

Depresioni pas lindjes mendohet se prek rreth një në shtatë nëna të reja. Te gratë, simptomat mund të shfaqen gjatë shtatzënisë ose brenda vitit të parë pas lindjes dhe përfshijnë humor të ulët, probleme me gjumin, vështirësi në përqendrim, ndjenjë faji dhe probleme në krijimin e lidhjes emocionale me foshnjën.

Në rastet më të rënda mund të shfaqen edhe mendime për vetëlëndim ose dëmtim të foshnjës.

Shkaqet e sakta nuk janë kuptuar plotësisht, por ndryshimet hormonale pas lindjes, përfshirë uljen e estrogjenit dhe progesteronit, si dhe faktorë të tillë si lindja e parakohshme apo problemet shëndetësore të foshnjës, besohet se luajnë rol.

Të paktën një në dhjetë baballarë mund të preket

Edhe pse vlerësohet se depresioni pas lindjes prek të paktën një në dhjetë burra, kërkimet mbi ndikimin e kësaj gjendjeje te baballarët kanë qenë shumë më të kufizuara.

Pas një studimi të madh të publikuar këtë vit, ekspertët po kërkojnë më shumë vëmendje ndaj shëndetit mendor të baballarëve të rinj.

Sipas tyre, edhe te burrat gjendja mund të lidhet me ndryshime hormonale, por shenjat mund të jenë dukshëm të ndryshme nga ato që shfaqen te gratë.

Psikologu Brett A. Biller nga Hackensack University Medical Center shpjegoi se periudha para dhe pas lindjes sjell ndryshime të mëdha edhe për baballarët.

“Baballarët e rinj shpesh përjetojnë ndryshime hormonale, përfshirë uljen e testosteronit dhe rritjen e estrogjenit dhe kortizolit. Këto janë mekanizma që ndihmojnë në krijimin e lidhjes me fëmijën, por njëkohësisht mund t’i bëjnë ata më të ndjeshëm ndaj depresionit dhe ankthit”, tha ai.

Testosteroni i ulët është lidhur në disa studime me depresionin, ndërsa kortizoli është hormoni kryesor i stresit.

Rreziku rritet nëse preket edhe partnerja

Ekspertët vlerësojnë se rreziku që një baba të zhvillojë depresion pas lindjes mund të arrijë deri në 50 për qind nëse edhe partnerja e tij përballet me të njëjtën gjendje.

Megjithatë, besohet se vetëm rreth një në dhjetë raste te burrat diagnostikohet zyrtarisht, duke ngritur shqetësimin se shumë baballarë vuajnë në heshtje.

Një studim i madh suedez, i publikuar në “JAMA Network Open”, analizoi më shumë se një milion baballarë.

Studiuesit zbuluan se diagnozat për depresion dhe çrregullime të lidhura me stresin u rritën me rreth 30 për qind drejt fundit të vitit të parë pas lindjes, krahasuar me periudhën para shtatzënisë së partneres.

Sipas autorëve, përgjegjësitë dhe presioni i atësisë mund të ndikojnë gjithnjë e më shumë me kalimin e kohës, ndërsa mbështetja pas lindjes për burrat mund të jetë e pamjaftueshme.

Simptomat te burrat mund të jenë më agresive

Ndryshe nga nënat, te të cilat simptomat shpesh shfaqen si trishtim, izolim dhe tërheqje emocionale, baballarët mund të bëhen më nervozë, më të zemëruar ose agresivë.

Disa mund të kërkojnë arratisje përmes alkoolit apo substancave të tjera.

Shenja të tjera mund të jenë tërheqja nga jeta shoqërore, dhimbjet e shpeshta të kokës ose stomakut dhe humbja e interesit për aktivitetet që më parë u sillnin kënaqësi.

Ekspertët paralajmërojnë se kjo gjendje mund të tensionojë marrëdhëniet familjare dhe të rrisë rrezikun e problemeve emocionale dhe të sjelljes te fëmijët.

Mungesa e gjumit dhe presioni financiar ndikojnë

Sipas Billerit, gjumi i pamjaftueshëm, vështirësitë financiare dhe ndryshimet në marrëdhënien me partneren janë ndër faktorët që mund ta përkeqësojnë shëndetin mendor të baballarëve.

Shumë burra gjithashtu mund të shmangin kërkimin e ndihmës, sepse nuk duan ta largojnë vëmendjen nga partnerja dhe nevojat e saj pas lindjes.

Studiuesit suedezë sugjeruan se numri i ulët i diagnozave nuk do të thotë domosdoshmërisht se burrat kanë më pak simptoma.

Disa baballarë mund t’i minimizojnë ose t’i mbajnë për vete problemet emocionale dhe të mos kërkojnë ndihmë gjatë shtatzënisë së partneres apo pas lindjes.

Nevojitet më shumë vëmendje ndaj baballarëve

Ekspertët theksojnë se depresioni dhe ankthi te baballarët mund të jenë shumë më të përhapur nga sa tregojnë statistikat aktuale.

“Vetëm mund të hamendësojmë sa i përhapur është depresioni dhe ankthi te baballarët, por sa pak raste njihen, sepse burrat janë më të rezervuar ose nuk dinë si t’i raportojnë simptomat dhe të kërkojnë ndihmë”, tha Biller.

Studiuesit bëjnë thirrje që kujdesi pas lindjes të mos përqendrohet vetëm te nëna dhe foshnja, por të përfshijë në mënyrë më të rregullt edhe shëndetin mendor të babait.