Si të dalloni nëse simptomat e pranverës janë alergji, ftohje apo diçka më serioze

Kur keni dhimbje koke, rrjedhje hundësh, sy që kruhen dhe kollë të vazhdueshme, mënyra e trajtimit varet nga shkaku i simptomave, shpjegon dr. Ian Tullberg, mjek i kujdesit urgjent dhe familjar në Colorado Springs.

Shkaku mund të jetë një ftohje ose alergji sezonale, por edhe gripi vazhdon të qarkullojë. Po ashtu, mund të jenë viruse të tjera si streptokoku, pneumonia ose virusi respirator sincicial (RSV). Trajtimi ndryshon sipas diagnozës së mundshme.

Ftohja zakonisht shkakton rrjedhje hundësh, dhimbje fyti, kollë dhe ndonjëherë sekrecione nga sytë. Mund të ketë temperaturë të lehtë, por zakonisht pa dhimbje trupi. Shumica e njerëzve mund të vazhdojnë aktivitetet normale. Ilaçet pa recetë ndihmojnë, ndërsa zinku mund të shkurtojë pak simptomat, por përdorimi i tepërt është i rrezikshëm. Nëse simptomat zgjasin mbi dy javë, rekomandohet konsultë mjekësore.

RSV ka simptoma të ngjashme me ftohjen: teshtima, kollë, temperaturë dhe ulje oreksi. Shumica shërohen brenda një jave, por mund të jetë i rrezikshëm për foshnjat dhe të moshuarit. Diagnostikohet me tampon nazal.

Streptokoku i fytit prek më shpesh fëmijët 3–15 vjeç dhe shfaqet me temperaturë, qelb në fyt dhe gjendra të fryra në qafë. Testi pozitiv trajtohet me antibiotikë.

Gripi shkakton kollë, të dridhura, temperaturë mbi 38°C, dhimbje trupi, të përziera ose të vjella. Pacientët shpesh ndihen “sikur i ka goditur një kamion”. Ilaçet simptomatike ndihmojnë, ndërsa Tamiflu mund të jetë efektiv nëse merret brenda 48 orëve nga fillimi i simptomave, megjithëse mund të shkaktojë shqetësime në stomak.

Alergjitë dallohen sepse nuk shkaktojnë temperaturë. Hunda zakonisht është rozë e zbehtë, jo e kuqe si te ftohja. Simptomat mund të përkeqësohen nëse shoqërohen me infeksion sinusësh ose presion në fytyrë.

Këshilla kryesore: kërkoni ndihmë mjekësore nëse simptomat duken ndryshe ose më të rënda se zakonisht. /US News – Syri.net