Shëndeti i trurit: 5 këshilla nga neurologët për t’u ndjekur gjatë verës

Hidratimi, leximi dhe shoqërimi janë disa nga elementët kryesorë për të mbajtur trurin aktiv edhe gjatë pushimeve. Edhe pse vera sjell dëshirën për t’u shkëputur nga rutina dhe për të lënë pas stresin e grumbulluar gjatë vitit, neurologët theksojnë se periudha e pushimit nuk duhet të shndërrohet në një "pauzë mendore" të plotë. Aktiviteti i vazhdueshëm mendor është i rëndësishëm për shëndetin e trurit, veçanërisht për personat më të ndjeshëm.

Sipas një studimi të publikuar në ‘The Lancet Neurology’ në bashkëpunim me OBSH-në, rreth 43% e popullsisë botërore – ose 3.4 miliardë njerëz – jetojnë me të paktën një gjendje neurologjike. Goditjet në tru, demenca, epilepsia, migrenat kronike dhe neuropatitë janë ndër më të përhapurat. Vetëm në Itali, mbi 10% e familjeve kanë një anëtar të prekur nga një sëmundje neurologjike apo psikiatrike, me një kosto ekonomike prej rreth 87 miliardë euro në vit.

Këto shifra i kanë shtyrë neurologët italianë të nisin një iniciativë për të forcuar kujdesin neurologjik në nivel lokal, duke i dhënë më shumë peshë mjekësisë së afërt me pacientin, përtej qendrave spitalore. Sipas profesor Alessandro Padovani-t, president i Shoqatës Italiane të Neurologjisë (SIN), duhet të sigurohen trajtime të përshtatshme në kohën dhe vendin e duhur, përfshirë edhe gjatë pushimeve verore, kur shumë pacientë mbeten pa referenca të zakonshme.

Në kuadër të Strategjisë Italiane për Shëndetin e Trurit 2024–2031, SIN nënvizon se kujdesi për trurin duhet të jetë i vazhdueshëm, në çdo stinë, mjedis dhe fazë të jetës. Edhe në momentet e relaksit, është thelbësore të shmangen faktorët e rrezikut si stresi, dehidratimi, izolimi social apo teprimet ushqimore.

5 këshillat kryesore për shëndetin e trurit në verë:

Hidratim dhe ushqyerje e shëndetshme

Konsumo fruta, perime, drithëra të plota, peshk të pasur me omega-3 dhe yndyrna të shëndetshme. Shmang alkoolin, ushqimet e përpunuara dhe darkat e rënda. Hidratimi i duhur ndihmon metabolizmin e trurit dhe ruan temperaturën e trupit.

Gjumë i rregullt dhe cilësor

Fli 7–8 orë në natë. Gjumi i thellë përmirëson kujtesën, ekuilibrin emocional dhe elasticitetin e trurit. Studime nga University College London kanë vërtetuar efektet pozitive të gjumit në përpunimin e informacionit dhe shpejtësinë mendore.

Aktivitet fizik i përditshëm

Ecje, not, biçikletë apo çdo lëvizje për të paktën 30 minuta në ditë mund të ulin rrezikun e rënies njohëse deri në 30%. Edhe një seancë e vetme stërvitjeje përmirëson funksionet mendore dhe humorin për më shumë se 24 orë.

Stimulim mendor dhe marrëdhënie shoqërore

Leximi, bisedat, eksplorimi i vendeve të reja dhe lojërat mendore forcojnë kapacitetin njohës. Po aq të rëndësishme janë marrëdhëniet me të tjerët, të cilat mbrojnë nga depresioni dhe rënia e aftësive mendore.

Menaxhimi i stresit dhe parandalimi i traumave

Përdor teknika relaksuese për të ulur nivelin e kortizolit – hormonit të stresit dhe për të mbajtur trurin të qetë dhe të mbrojtur. Kujdesi ndaj trurit nuk ka pushim, madje vera është një mundësi ideale për ta forcuar atë.