Çfarë ndodh me trupin tuaj kur filloni të ngrini pesha pas të 50-ave

Edhe nëse nuk jeni ushtruar më parë, ngritja e peshave pas të 50-ave sjell përfitime të mëdha. Sipas Debra Atkinsonit, eksperte në ushtrime për moshat e mëdha, muskujt mund të forcohen në çdo moshë. “Është çështje e vendit dhe ritmit të duhur,” thotë ajo. Edhe dr. Gabrielle Lyon thekson se që të jesh i fortë në moshën 80 vjeç, duhet të fillosh të stërvitesh me qëllim në të 50-at.

Gjithsesi, përpara se të nisni, këshillohuni me mjekun, sidomos nëse keni probleme shëndetësore si osteoporoza.

1. Parandalon humbjen e masës muskulore
Pas moshës 30 vjeç, trupi fillon të humbasë muskuj në mënyrë të natyrshme, një proces që përshpejtohet pas të 60-ave dhe quhet sarkopeni. Sipas një studimi të vitit 2022, stërvitja me pesha mund ta ngadalësojë ose përmbysë këtë proces. Ajo ndihmon në rindërtimin e fibrave muskulore të dëmtuara gjatë ushtrimeve.

2. Forcon kockat
Gratë pas menopauzës humbasin ndjeshëm dendësinë e kockave për shkak të uljes së estrogjenit. Sipas mjekëve, ngritja e peshave stimulon ndërtimin e kockave, duke rritur aktivitetin e osteoblasteve (qelizat që krijojnë kocka). Kjo është një nga mënyrat më natyrale për të forcuar skeletin pa ilaçe.

3. Përmirëson funksionin e trurit
Studimet tregojnë se ngritja e peshave përmirëson funksionet njohëse, ndihmon kundër depresionit dhe nxit prodhimin e një faktori të rëndësishëm për trurin (BDNF). Sipas dr. Lyon-it, kjo stërvitje ndihmon në përqendrim, humor dhe parandalon demencën.

4. Përmirëson shëndetin metabolik
Muskujt janë inde metabolikisht aktive që ndihmojnë në rregullimin e sheqerit në gjak, ndjeshmërinë ndaj insulinës dhe djegien e kalorive. Te gratë pas menopauzës, rënia e estrogjenit ndikon në shtimin e dhjamit dhe rezistencën ndaj insulinës, që lidhen me diabetin dhe sëmundjet kardiovaskulare. Stërvitja me pesha ndihmon në ruajtjen e muskujve dhe një metabolizëm më të shëndetshëm.

5. Rrit ekuilibrin dhe koordinimin
Rrëzimet janë shkaku kryesor i vdekjeve të lidhura me lëndime te të moshuarit. Ngritja e peshave përmirëson forcën në muskujt e këmbëve, bërthamën e trupit dhe ndjesinë e trupit në hapësirë (propriocepcioni), duke ulur rrezikun e rënieve.

Si të filloni pas të 50-ave
- Filloni me dy ditë në javë, me pushime të mjaftueshme ndërmjet tyre.
- Zgjidhni lëvizje funksionale, që imitojnë aktivitete të përditshme si ngritja nga një karrige ose mbajtja e qeseve.
- Prioritet jepini teknikës, jo peshës. Bëni 1-2 seri me 15–20 përsëritje për të ndërtuar një bazë të fortë. / Prevention - Syri.net