Presidenti i Serbisë, Aleksandar Vuçiç ka njoftuar një ndryshim të madh të taktikës në luftën kundër koronavirusit, pasi mori këshillat e një ekipi epidemiologësh kinezë që vizituan vendin. 

Pasi foli me ekspertët kinezë, Aleksandar Vuçiç tha se Serbia do të kalojë në një regjim të testimit në masë dhe do të izolojë ata që testohen pozitivë në objektet e improvizuara, edhe nëse kishin simptoma të lehta, pasi vetëm shtetrrethimi nuk do të funksionojë.

Ai tha se shpresonte që strategjia e re do të jetë në gjendje të përmbajë koronavirusin në vend brenda një muaji. Serbia aktualisht ka 249 raste dhe tri vdekje të konfirmuara nga koronavirus, megjithëse deri tani testimi ka qenë minimal.

“Ne jemi të gatshëm të vendosim 3000 shtretër menjëherë, këta janë për pacientët e prekur më lehtë, të cilët do të futen shpejt dhe do të dalin shpejt, por ne do ta shohim sëmundjen e tyre deri në fund, në mënyrë që ata të mos infektojnë askënd tjetër”, tha Vuçiç. Rastet më të rënda do të vendosen në spitale. Kina i ka siguruar Serbisë dërgesa me maska dhe pajisje të tjera mjekësore.

Kur ekipi mjekësor kinez mbërriti në Beograd të shtunën, Vuçiç i priti dhe puthi flamurin kinez në mirënjohje. “Megjithëse Kina nuk e ka përfunduar ende luftën kundër koronavirusit, ata thanë se dhe ata do ta ndihmojnë Serbinë. Populli serb nuk do ta harrojë kurrë këtë mirësi”, tha Vuçiç.