‘Eurostat zhbëri propagandën e qeverisë’, Teliti: Po përballemi me një krizë humanitare...

Koordinatori ekonomik i Programit Ekonomik të PD, Dorian Teliti shprehet se Eurostat bëri të mundur zhbërjen e propagandës së qeverisë së Edi Ramës, teksa të dhënat e nxjerra treguan se 1 në 3 shqiptarë nuk është në gjendje të paguajë as qiranë.

Përmes një statusi në rrjetet sociale, Teliti shkruan se kjo nuk është thjesht statistikë, por dështim i plotë dhe i qëllimshëm nga sekti qeverisës, që sipas tij ka braktisur qytetarin e thjeshtë për t'u shërbyer oligarkëve të ndërtimit.

‘Po përballemi me një krizë humanitare të fshehur pas dritave verbuese të fasadave!’, shkruan Teliti.

Sipas zyrtarit të PD,  Shqipëria nuk zhvillohet me propagandë, por me ekonomi që punon për njerëzit dhe jo për klanet e pushtetit.

Statusi

EUROSTAT ZHBËN PËRSËRI PROPAGANDËN: 1 NË 3 SHQIPTARË NUK PAGUAN DOT AS QIRANË!

​Ndërsa na shurdhojnë veshët përditë me suksese imagjinare dhe boom-in që ekziston vetëm në ERTV, shifrat zyrtare të Europës na përplasin fytyrës, për të disatën herë, të vërtetën e dhimbshme.

​Sipas Eurostat, plot 35% e shqiptarëve nuk përballojnë dot pagesën e qirasë apo kostot bazë të jetesës. 1 në 3 qytetarë jeton me ankthin e përmuajshëm se mos mbetet pa kulm mbi kokë!

​Kjo nuk është thjesht statistikë, por dështim i plotë dhe i qëllimshëm nga sekti qeverisës që ka braktisur qytetarin e thjeshtë për t'u shërbyer oligarkëve të ndërtimit.

​Rritën çmimet e pronave në qiell përmes pastrimit të parave dhe i cuan qiratë në nivele stratosferike ndërkohë që 1/3 e vendit nuk siguron dot as minimumin jetik.

Po përballemi me një krizë humanitare të fshehur pas dritave verbuese të fasadave!

Shqipëria nuk zhvillohet me propagandë, por me ekonomi që punon për njerëzit, jo për klanet e pushtetit.

Ndaj ndihu shqiptar, mjaft ke vuajtur e duruar!