Spahia kërkon reformë të thellë në shëndetësi: Fondi publik duhet të shkojë te pacienti, jo te drejtuesit e pangopur

Deputeti Bardh Spahia në forumin “Transparencë në Shëndetësi” kërkoi reformë të thellë në sistemin shëndetësor shqiptar, duke theksuar nevojën për investime në teknologji, infrastrukturë dhe trajnimin e personelit.

“Transparenca në shpenzimin e fondeve publike duhet të sigurojë që çdo lek të shkojë te pacienti dhe jo te drejtuesit e pangopur,” theksoi Spahia.

Reagimi i plotë:

Shëndetësia nuk pret: Transparenca është vetëm hapi i parë!

​Në Shkodër, në forumin “Transparencë në Shëndetësi”, pata rastin të ndaja mendimet e mia mbi një nga temat më delikate, por edhe më përcaktuese për të ardhmen tonë: Cilësinë e jetës dhe aksesin në mjekësi. 

​Gjatë diskutimit, ishte e pamundur të mos ndalesha tek një e vërtetë që e prekim të gjithë. Sistemi ynë shëndetësor ka nevojë për një ndërhyrje radikale. 
​
Nuk mund të pretendojmë shërbim me standarte evropiane me buxhete të limituara si pasojë e abuzimit dhe vjedhjes së pafund të fondeve publike. Duhet investuar në kërkim, teknologji e aparatura, në infrastrukturë, dhe mbi të gjitha në trajnimin dhe azhornimin e dijeve për personelin mjekësor por edhe vlerësimin në dinjitetin financiar të bluzave të bardha. 

Sistemi ka nevojë për një "Riformatim" të plotë. Nga menaxhimi i spitaleve rajonale te furnizimi me barna, çdo hallkë duhet të funksionojë siç duhet, larg abuzimeve dhe pa burokraci që kushtojnë jetë njerëzish.
​
Kur paraja publike ndiqet me transparencë, ajo shkon te pacienti dhe jo tek qeveritarët apo drejtuesit e pangopur në kurriz të taksapaguesve. Ky ishte edhe thelbi i takimit të sotëm në Shkodër.
​E vlerësova shumë këtë takim me profesionionistë dhe njerëz që nuk pranojnë më "status quo-në". Pjesëmarrja në këto platforma diskutimi dhe informimi është pjesë e përpjekjeve tona për të rritur kërkesën për llogari-dhënie ndaj institucioneve qeveritare dhe për të kontribuar në përmirësimin e shërbimit shëndetësor. 

​#ShendetesiaNeFokus #ReformaShendetesore #Transparenca #Shqiperia #Shkodra #DialogPublik #InvestimiNeJete