PS rrëzoi kërkesën për arrestimin e Ballukut, Ambasada e Holandës: SPAK të veprojë pa pengesa

Ne një reagim të qartë dhe të drejtpërdrejtë në rrjetet sociale, Ambasada e Holandës në Shqipëri ka shprehur shqetësimin për rrëzimin nga Partia Socialiste të kërkesës së SPAK për heqjen e imunitetit të Belinda Ballukut.

Në postimin e saj, ambasada nënvizon se përparimi i Shqipërisë drejt Bashkimit Evropian varet nga zbatimi i drejtësisë, duke kërkuar që korrupsioni, edhe në nivelet më të larta, të ndiqet penalish në mënyrë efektive dhe pa pengesa.

Sipas saj, politika shqiptare ka përgjegjësinë e plotë për të garantuar funksionimin e sistemit të drejtësisë dhe ruajtjen e integritetit të shtetit ligjor.

Lexo edhe: Vjen ‘shuplaka’ edhe nga Berlini/ Ambasada gjermane: Kusht për integrimin, ndjekja penale pa pengesa

Lexo edhe:  ‘Arrestimi i Ballukut’/ Ambasada Britanike: Imuniteti nuk duhet të jetë pengesë për llogaridhënie para ligjit

Reagimi:

Lidhur me vendimin e sotëm të Parlamentit të Shqipërisë në lidhje me heqjen e imunitetit, Ambasada e Mbretërisë së Holandës në Shqipëri deklaron: Holanda mbështet integrimin e Shqipërisë në Bashkimin Evropian, në përputhje me dëshirat e popullit shqiptar.

Një kërkesë kyçe për përparimin në këtë proces të bazuar në meritë është ndjekja efektive penale e korrupsionit, përfshirë edhe në nivelet më të larta. Ne presim qartë që, në raste të tilla, sistemi i drejtësisë do të jetë në gjendje të vazhdojë shpejt dhe pa pengesa. Politika shqiptare mbetet përgjegjëse për sigurimin e këtij procesi.