Pas diskutimeve ne konferencën e kryetarëve opozita dhe mazhoranca kanë shtyre për në date 30  tetor, çështjen e ngritjes së dy komisioneve hetimore, për aferën McGonigal dhe 11 majit. Mbledhja u shoqërua me debate pasi opozita akuzoi mazhorancën se po ndalon debatin në kuvend,  me urdhër politik, duke u munduar të asgjësojë opozitën. 

Syri tv

Opozita dhe mazhoranca  kanë shtyre për në datë 30  tetor,  vendimmarrjen per ngritjen e dy komisioneve hetimore te kërkuara nga Partia Demokratike, për veprimtarinë e ish zyrtarit të larte Charles Mcgonigal dhe lidhjeve të tij me kryeministrin Edi Rama, dhe për  ndërhyrjen e institucioneve qendrore dhe vendore, në zgjedhjet e 11majit . Në përfundim të mbledhjes së konferencës së kryetareve, deputeti demokrat, Belind Këllicci deklaroi se mazhoranca ka kërkuar kohë për të  paraqitur një tekst alternativ për objektin e hetimit dhe kërkesën e hartuar nga demokratet.   

Ndërsa kreu i grupit parlamentar socialist Taulant Balla deklaroi përmes një postimi në twitter se kërkesa për ngritjen e komisioneve hetimore duhet të  bazohet në rregullat e gjithëpranuara. 

Sot në konferencën e kryetarëve kam rishprehur qëndrimin&dëshirën tonë të pranojmë çdo kërkesë/instrument kontrolli parlamentar. Çdo kërkesë të bazohet në rregullat e gjithëpranuara nga ligji&vendimet e GJK, në fakte dhe grup-fakte, jo në thashetheme.

Mbledhja e konferencës së kryetareve u shoqërua me tensione, pasi opozita akuzoi mazhorancën se po ndalon debatin parlamentar me urdhër politik dhe po përjashton kreun e grupit parlamentar të Partisë demokratike, vetëm sepse kerkoi  respektimin e rregullores. Deputeti demokrat Belind Këlliçi dhe kreu i grupit parlamentar të PL, Tedi Blushi akuzuan partinë socialiste se po tenton të asgjësojë opozitën në kuvend. 

Edhe për kërkesën e opozitës për zhvillimin e një mocioni debati për onkologjikun, mazhoranca kërkoi më shumë kohë për tu shprehur.