Qeveria e Shqipërisë dhe ajo e Maqedonisë do të zhvillojnë një mbledhje të përbashkët në vjeshtën e këtij viti në Pogradec.

Lajmin e ka bërë të ditur, ministri i Jashtëm Ditmir Bushati gjatë konferencës së përbashkët për shtyp me Ministrin e Jashtëm të Maqedonisë, Nikola Dimitrov, i cili po zhvillon sot një vizitë në Tiranë.

"Në vijim të takimit të Triestes, - tha Bushati, - ne sot ramë darkord për të zhvilluar mbledhjen e përbashkët të dy qeverive tona vjeshtën e këtij viti në Pogradec. Ky do të jetë një zhvillim i ri në marrëdhënien ndërmjet dy vendeve tona dhe do të krijohet mundësia që përmes këtij mekanizmi të prioritizojmë sektorët e bashkëpunimit për të lehtësuar në këtë mënyrë realizimin e projekteve strategjike që do të sigurojnë financimin përmes kombeve europiane dhe ndërkombëtare"

Kryediplomati Dimitrev nga ana e tij, deklaroi se "ne i gëzohemi takimit të ardhshëm, po ashtu edhe nënshkrimit të deklaratës së Adriatikut, që do të mbahet këtu në Tiranë, në qytetin tuaj e do të ketë shumë domethënie për ne si vendi i 30, anëtar i NATO-s."

I pyetur nga gazetarët nëse Shqipëria ka ndonjë çështje të hapur me Maqedoninë, Bushati deklaroi se Shqipëria nuk ka ndonjë çështje të hapur me Maqedonië, por kërkon vetëm angazhim, bashkëpunim.