Kush, çfarë tha pasi deputetët nuk i votuan Albulena Haxhiun dhe Donika Gërvallën për kryeparlamentare

Peci thotë se ka pasur pritje që LDK-ja dhe AAK-ja mund të mbështesnin kandidaturën e Gërvallës

Bashkëkryetari i partisë Guxo, Faton Peci, tha se ka pasur pritje që LDK-ja dhe AAK-ja mund të mbështesin kandidaturën për kryeparlamentare të Donika Gërvallës.

“Kam menduar që mund të reflektojë LDK-ja, për shkak se në gjenezë dhe veprimtari, Donika është më LDK sesa këta që sot janë në LDK”, tha ai për gazetarë.

“E dyta, nuk e kam hequr nga lista e pritjeve as AAK-në, përkundër ballafaqimeve të ashpra që Donika ka pasur me zotin Haradinaj”, shtoi Peci.

Sipas tij, “inati e mposht arsyen në politikë”, duke akuzuar partitë që mandatin e kaluar ishin në opozitë për bllokim të konstituimit të Kuvendit.

“Prej sot është e qartë që pretendimi i partive opozitare që problemi i moskonstituimit të Kuvendit është emri i Albulena Haxhiut nuk qëndron. Problemi i opozitës është se kanë hyrë në aranzhmane me grupe të tjera për të parandaluar Qeverinë Kurti 3”, theksoi Peci.

Ai tha se LVV-ja dhe partnerët e saj, ende nuk kanë vendosur se kush do të kandidohet në seancën e radhës.

Murati: LVV-ja ofroi kandidat tjetër, PDK, LDK e AAK kanë për qëllim bllokimin

Deputeti i Lëvizjes Vetëvendosje, Hekuran Murati, drejtoi akuza ndaj PDK-së, LDK-së, AAK-së dhe partive të tjera për bashkim në bllokimin e konstituimit të Kuvendit.

Ai tha se këto parti janë bërë bashkë për të penguar formimin e institucioneve dhe si dëshmi për këtë, sipas tij, është mosvotimi i Donika Gërvallës për kryetare të Kuvendit.

“Ne kemi besuar se nëse bëjmë hapin e parë të kompromisit, sot do të ketë reflektim nga opozita”, u shpreh Murati.

“Ne ofruam dikë tjetër dhe u dëshmua që ata funksionojnë bashkë me Listën Serbe”, shtoi ai.

Murati, i cili kritikoi edhe Gjykatën Kushtetuese, tha se opozita është e interesuar të bllokojë procesin, pavarësisht emrit të kandidatit.

“Ata janë të interesuar të bllokojnë, pavarësisht emrit”, tha Murati.

Deputeti i Lëvizjes Vetëvendosje, Hekuran Murati, e quajti të çuditshëm vendimin e Gjykatës Kushtetuese.

Ai tha se, po të ishte mundësuar votimi i fshehtë, njëra nga kandidatet, Albulena Haxhiu apo Donika Gërvalla, do të ishte zgjedhur kryetare e Kuvendit.

Murati, tha se partia e tij do të konsultohet me strukturat në ditët në vijim për të vendosur se si do të veprohet tutje.

Ai shtoi se emri i Donika Gërvallës për kryetare të Kuvendit ka dalë nga konsultimet brenda partisë.

Kadrijaj: Edhe në seancat e tjera LVV-ja do të propozojë kandidatë që nuk kanë vota

Deputetja e AAK-së, Time Kadrijaj, e akuzoi LVV-në se me qëllim sot propozoi kandidate që nuk e kanë mbështetjen e partive që mandatin e kaluar ishin në opozitë.

“Do të shihni, edhe në seancat në vijim do të propozohen figura të tilla që nuk kanë përkrahje”, tha ajo.

Kadrijaj tha se seanca e sotme është dashur të nisë me një “kërkimfalje” nga Dehari dhe LVV-ja, pasi siç tha, “e kanë shkelur Kushtetutën.

Ajo tha se partitë që ishin në opozitë kanë ofruar alternativa për daljen nga ngërçi politik, por LVV-ja nuk i ka pranuar këto opsione.

"Po shihet që LVV-ja nuk është e interesuar për zhbllokim të situatës" tha ajo, duke iu referuar propozimit për kryeparlamentare të Albulena Haxhiut dhe Donika Gërvallës.

Bajrami: LVV-ja e ka ditur që as Gërvalla nuk i merr votat e nevojshme
Deputetja e Lidhjes Demokratike të Kosovës, Hykmete Bajrami, tha se Lëvizja Vetëvendosje nuk është fare e interesuar që të zgjidhet situata në Kuvendin e Kosovës.

Ajo theksoi se edhe propozimi i Donika Gërvallës ishte vetëm një veprim për të prolonguar konstituimin e Kuvendit.

“LVV-ja sot propozoi dy kandidate për të cilat dihej paraprakisht se nuk i kanë votat”, tha Bajrami./rel