‘Grabitje me uniformë’/ Autori i emisionit Vetting: News24 po shkretohet nën mbrojtjen e policisë dhe ushtrisë

Një operacion i paligjshëm dhe i paprecedentë po zhvillohet në zemër të Tiranës, brenda ambienteve të televizionit News24.

Autori i emisionit Vetting në News 24, Ardian Bushi shprehet në një deklaratë të tijen se nën mbulesën e ushtrisë dhe policisë, civilë të paidentifikuar po grabisin hapur pajisjet e redaksisë, në një akt që ngjan më shumë me represion autoritar sesa me shtet ligjor.

Deklarata e plotë:

Një operacion i pazakontë dhe i paligjshëm po ndodh në zemër të kryeqytetit, në ambientet e televizionit News24. Pas hyrjes së një kamioni me targa AA 787 PM të dyshuara si targa false në zonën e blinduar nga policia e shtetit dhe ushtria, situata ka marrë një kthesë edhe më alarmante: tashmë brenda janë futur edhe mjete të ushtrisë.

Civilë të paidentifikuar, nën mbrojtjen e forcave të armatosura, kanë shqyer dyer dhe po nxjerrin jashtë sendet personale dhe pajisjet e punës së gazetarëve: karrige, tavolina, tapete, kompjuterë, pajisje transmetimi. Ajo që po ndodh nuk është sekuestrim zyrtar, nuk është zbatim i një vendimi gjykate është një grabitje e hapur, ditën për diell, e mbuluar nga prania e forcave shtetërore.

Ky akt përbën një precedent të rrezikshëm: ushtria dhe policia, që duhet të mbrojnë pronën dhe qytetarët, po përdoren si mburojë për të shkatërruar e zhdukur mjetet e një redaksie mediatike. Në thelb, kjo është një goditje e drejtpërdrejtë ndaj lirisë së medias, e ngjashme me praktikat e regjimeve autoritare që fillojnë kontrollin duke shuar zërat kritikë.

Përmasat e këtij skandali janë të papara në Shqipërinë e pas viteve ‘90. Kjo nuk është vetëm çështje pronësie është një sulm frontal ndaj së drejtës për të informuar dhe ndaj çdo gazetari që beson te puna e tij.