Meri Lika, duke marrë fjalën në tubimin qytetar që zhvillohet në mbështetje të liderit të opozitës, Sali Berisha, solli në vëmendje rastin e Ina Kasimatit, aktivistes që u nda nga jeta pak kohë më parë.

Lika tha se Ina Kasimati, edhe pse kishte dhënë një kontribut prej 30 vitesh në arsim, nuk arriti të kishte shtëpinë e saj, pasi Bashkia nuk ia dha kurrë një të tillë.

“Ina Kasimati u kurua për muaj me rradhë me një ilaç që nuk I veproi, ndërsa ilaçin real që duhej të merrte, ia thanë se nuk e kishin në spital. Pra shëndetësia shqiptare e dënoi me vdekje Ina Kasimatin.

Ajo kërkoi protokollin e plotë për kurimin e sëmundjes së saj, kërkoi dinjitet. Madje ajo në postimin në rrjetet sociale, në ditën e ndërgjegjësimit qytetar kundër kancerit të gjirit, I ka drejtuar një apel ministres së Shëndetësisë dhe kurrë nuk mori përgjigje”, tha Meri Lika.

Dhe duke iu referuar Ina Kasimatit, Meri Lika u shpreh se Ina e humbi luftën me jetën e saj, por ajo na thotë se e vrau sistemi, korrupsioni, babëzia e qeveritarëve.

“Taksat e shqiptarëve vidhen nga qeveritarët e pangopur, sepse taksat tona vidhen nga drejtorët e ‘5D’ dhe nuk shkojnë për ti dhënë një shtëpi grave dhe vajzave që vuajnë nga sëmundje të tilla, si ajo e Inës”, tha Meri Lika.