Në prag të konventës së 27 prillit, kryetari I Partisë së Lirisë, Ilir Meta deklaroi se është i hapur për garë dhe fraksione në parti. Meta u shpreh i vendosur për koalicionin me Partinë Demokratike, duke thënë se i vetmi kusht për aleancën e opozitës është të vijojnë qëndrimet pa kompromis, ndaj qeverisë së kryeministrit Edi Rama. 

Nga SYRI TV

Pas miratimit të listës së anëtarëve të Kryesisë që do  t’i propozohet Konventës Kombëtare, kryetari i Partisë së Lirisë, Ilir Meta, zhvilloi një konferencë për shtyp, duke thënë se gara është e hapur për pozicionet e reja drejtuese në parti. Meta theksoi se fraksionet do të jenë të lejuara në Partinë e Lirisë.

Ilir Meta u shpreh i vendosur për vijimin e koalicionit me Partinë Demokratike,  duke thënë se kushti i vetëm për aleancën ngelet  vijimi i luftës pa kompromis ndaj qeverisë së kryeministrit Edi Rama, ndërsa paralajmëroi se edhe në Shqipëri do të refuzohet plani i shpopullimit, siç ndodhi në zgjedhjet e Maqedonisë së Veriut. 

Partia e Lirisë do të mbledhë të shtunën e 27 prillit, Konventën Kombëtare, ndërsa  Ilir Meta ka nisur atë që e cilëson si rithemelimin e kësaj force politike.