Si mund t’i besohet një vendi, apo një qeverie që popullsinë e saj e ka degdisur në emigracion dhe vendin e kthen në “kamp refugjatësh” të shteteve të tjera? Paradoksi është aq i madh sa këtë herë megallomania erdhi pas një darke të këndshme buzë detit mes Ramës dhe homologes italiane Georgia Meloni. Premtimi i asaj “nate vere” u kurorëzua me marrëveshjen mes dy vendeve për ngritjen e një kampi refugjatësh në Lezhë. Emigrantët, kryesisht afrikanë që kapeshin në det nga pala italiane, (të rinj dhe burra), sipas marrëveshjes do të futen në kampet që do hapen në Lezhë, ndërsa gratë dhe të miturit do mbahen në Itali.

Këtu në vendin tonë Rama si dha kujt llogari, madje as ministrat dhe deputetët e PS-së nuk dinin për këtë marrëveshje e cila u nënshkrua në Itali. Të parët që reaguan ashpër ishin përfaqësues të opozitës italiane, duke dënuar fort këtë nismë pasi sipas tyre hapja e një kampi emigrantësh në një vend tjetër shkel liritë dhe të drejtat e njeriut. Nuk shkoi gjatë dhe tashmë është alarmuar edhe BE për këtë nismë që së pari mban firmën e Ramës, si një vetëofrues për ta kthyer Shqipërinë një Kamp të rrethuar ku mbahen qenie njerëzore që ikin nga vendet e luftës.

“Memorandumi i Mirëkuptimit (MoU) ndërmjet Italisë dhe Shqipërisë për zbarkimin dhe përpunimin e kërkesave për azil, i përfunduar javën e kaluar, ngre disa shqetësime për të drejtat e njeriut dhe shton një prirje shqetësuese evropiane drejt kontraktimeve të jashtme të përgjegjësive për azil,” tha sot Komisionerja Evropiane për të Drejtat e Njeriut në Këshillin e Evropës, Dunja Mijatovic.

Minimalisht Rama duhet të ndihej në siklet për këtë nismë e cila u nis me shumë bujë dhe po tretet pa lënë gjurmë kund. Së pari ka të bëjë me vendin ku do të trajtohen dhe mbahen të mbyllur në kampe emigrantët. Ky vend është Shqipëria, e cila ka mbushur kapanonet e azilantëve në vendet e BE-së me njerëzit e saj dhe nga ana tjetër vetëofrohet për të ngritur kampe për pritjen e refugjatëve nga vendet e “botës së tretë”.

Po ashtu në çdo raport ndërkombëtar Shqipëria konsiderohet vend me probleme serioze në zbatimin e ligjit, sigirinë, apo edhe shkeljen e të drejtave themelore të njeriut. Ende renditemi si shtet që ndodhet në listën e kuqe të trafikut të qenieve njerzore. Varfëria është një tjetër fenomen që po detyron të rinjtë të largohen. Po ashtu korrupsioni në nivelet e larta qeverisëse cilësohen problem serioz. Mjafton vetëm kaq që BE të alarmohet duke mos lejuar që emigrantët afrikanë të përfundojnë në “safarin e hijenave”. Një kryeqeveritar që bredh nëpër botë për të marrë vëmendje mediatike si “lider që zgjidh problemet e botës”, në fakt është aq qesharak sa detyron organizmat e vendeve të BE-së që të reagojnë dhe frenojnë çdo marrëveshje okulte ku në mes është Rama.

Shqetësimi i shumë shqiptarëve që kjo nismë do nxiste trafikimin e qenieve njerësore, apo do të krijonte probleme serioze me sigurinë pasi mes emigrantëve mund të ketë edhe individë me qëllime terroriste, për Raman nuk është problem, madje as nuk llogarit askënd. Fatmirësisht Europa e njeh mirë Ramën.

Të ishte për reagimin në vend për ca më shumë vëmendje mediatike ndërkombëtare kryeministri mund të ofronte çdo hapësirë të mundshme për ta kthyer në një “big kamp” dhe herë pas herë ti vizitonte si “shpëtimtari i botës”, që zggidh problemet e emigrimit, paraqet rezultuta për luftën Izrael-Hamas, apo edhe Rusi-Ukrainë… Tmerrimi i BE-së të paktën këtë herë e detyron Ramën të frenojë paksa në lëndinën e haluçinacioneve. Një vend që eksporton njerëz me gomone dhe mbush kampet e azileve në Europë nuk mund të jetë zgjidhje i problemeve botërore të emigracionit ilegal./boldnews