Skandalet në procesin politik ndaj liderit të opozitës Sali Berisha nuk kanë të sosur. Pas një serie seancash sa skandaloze aq edhe qesharake, gjykata ka konfirmuar masën e sigurisë 'detyrim paraqitje' dhe ndalim për daljen jashtë Shqipërisë për kreun e Partisë Demokratike, Sali Berisha. Pas tërheqjes së dy avokateve të caktuara një ditë më parë, Gjykata caktoi si avokate kryesisht të Sali Berishës, Valentina Todoreskun, e cila rezulton ithtare e Edi Ramës dhe e regjimit komunist të Enver Hoxhës.
Nga SYRI TV
Procesi politik ndaj liderit të opozitës Sali Berisha ka vijuar edhe sot I shoqëruar me skandale të njëpasnjëshme nga ana e GJKKO dhe SPAK-ut. Pas një serie seancash sa skandaloze aq edhe qesharake, gjykata ka konfirmuar masën e sigurisë 'detyrim paraqitje' dhe ndalim për daljen jashtë Shqipërisë për kreun e Partisë Demokratike, Sali Berisha.
Në orën 10:00 të paradites, në seancë u paraqitën avokatet e caktuara kryesisht Rabije Cenalia dhe Jalldiz Kastrati. Pasi u vendos për një pushim që avokatet të njiheshin me aktet, avokatja Kastrati deklaroi se kishte marrë përsipër mbrojtjen.
Por pas nisjes se seancës në orën 15:00, GJKKO shpërndau një njoftim sipas të cilit dy avokatët e caktuara ‘kryesisht’ nuk morën përsipër realizimin e mbrojtjes dhe se gjykata kishte caktuar si avokate kryesisht, Valentina Todoreskun.
Teksa dy të parat i thanë gjykatës se heqin dorë nga mbrojtja, në rrethana që nuk njihen ende, futja e Todoreskut në sallë ngre dyshime se gjykata kishte marrë masa që procesi të vijonte.
Në dalje të gjykatës, dy avokatet e dorëhequra Rabije Cenalia e Jalldiz Kastrati nuk pranuan të komentojnë mbi dorëheqjen e tyre, por as arsyen pse qëndruan të izoluara në sallë pavarësisht se kishin hequr dorë, e për më tepër ishte dikush tjetër që po bënte mbrojtjen.
Më herët gjatë ditës, avokatja Cenalia kishte kërkuar dy ditë kohë për t’u njohur me çështjen. Sipas burimeve, prokurorët e SPAK e kanë kërcënuar atë se do të njoftojnë Dhomën e Avokatisë për refuzimin e saj ndërkohë që avokatja tha se nuk kishte refuzuar, por vetëm kishte kërkuar më shumë kohë për të studiuar dosjen.
Por skandalet nuk kanë të sosur edhe me avokaten e re të caktuar nga Gjykata, Valentina Todoreskun. Ashtu siç avokati i caktuar për mbrojtjen e Sali Berishës, Artan Simoni i cili sulmonte hapur në rrjetet sociale liderin e opozitës, edhe Valentina Todoresku rezulton një ithtare e Rilindjes dhe Kryeministrit Edi Rama.
Pas një verifikimi të shpejtë në faqen e saj në Facebook, shihet se avokatja që gjykata i caktoi Sali Berishës bënte share postimet e Kryeministrit Edi Rama e për me tepër ithtare e regjimit komunist dhe diktatorit Enver Hoxha.
Po sot GJKKO rrëzoi kërkesën e paraqitur nga Kryetari i Partisë Demokratike, Sali Berisha përmes avokatëve të tij, për përjashtimin e gjyqtares Irena Gjoka nga gjykimi i çështjes. Gjyqtarja Irena Gjoka akuzohet për ‘shpërdorim detyre’ dhe shkelje të Kushtetutës së Republikës së Shqipërisë, por gjykata nuk e mori parasysh kërkesën dhe vendosi rrëzimin e saj përmes një vendimi të gjyqtares Flora Hajredinaj.
© SYRI.net