Sikur të mos mjaftonte fakti se zv-drejtori i SHISH, i komanduar drejtor, është një individ që ka ndryshuar emrin dhe akoma nuk ka dhënë shpjegime mbi këtë, duke shkelur një ndër kushtet bazë të sigurisë në SHISH, Kanushi ka vazhduar shkeljen e ligjit të SHISH duke shkelur dhe manipuluar një ndër kriteret bazë, si është kushti i sigurisë për stafin e tij të afërt.

Më herët në media është shkruar se këshilltari i tij, Redi Lamaj, ish-drejtor i Digitalb, ka ushtruar postin e këshilltarit në mënyrë të jashtëligjshme, pasi për dy muaj me radhë ai ka patur akses në të gjitha ambientet dhe informacionet e SHISH pa u pajisur më parë me certifikatën e sigurisë, si parakusht për të filluar punë në SHISH. Vetëm pak kohë më parë ai është pajisur me certifikatën e sigurisë, por edhe këtu duket se Kanushi ka shkelur ligjin duke e pajisur me certifikatën e sigurisë pa u kryer një hetim i plotë ose duke manipuluar provat.

Sipas burimeve të Syri.net, rezulton se këshilltari i Kanushit të jetë arrestuar në Spanjë në vitin 2020. Edhe pse aktualisht në gjendje të lirë, këshilltari Lamaj rezulton të jetë në ndjekje penale aktive nga autoritetet spanjolle. Lamaj nuk është person i panjohur nga mediat.

Ai u bë i njohur në vitin 2019 pas përplasjeve të Digitalb. Në debatin e Digitalb u përfshi atë kohë edhe Sali Berisha, i cili pati qenë shprehur: ‘Ky është drejtori i ri i Digitalb. I punësuar si jurist në fillim të vitit në këtë kompani, quhet Redi Lamaj. Nuk njihet në rrethin mediatik, nuk ka asnjë njohuri për median.

Ky është drejtori momental pas largimit të Albana Shkurtës, ish-zv.ministres, që nuk pranoi shantazhet që i vinin nga drejtuesit dhe u largua. Ky djali ka punuar jurist në një bankë, është i sjellë nga partia, i paaftë, arrogant, pa asnjë eksperiencë në media dhe vetëm merret me ekzekutim e urdhrave të Blushit për heqjen e punonjësve që kanë 15 vjet që punojnë me djersë.

Ky merr listat dhe pret kokat e punonjësve me urdhër nga udhëheqësit. I vendosën flakën, Digitalbit. 

Rezulton gjithashtu se SHISH nuk ka kryer hetime të plota ose i ka fshehur në lidhje me përfshirjen e këshilltarit Lamaj në bixhoz, një kusht tjetër ligjor i SHISH që ndalon kategorikisht punësimin në institucionin kryesor të sigurisë kombëtare.

Shkeljet ligjore në lidhje me sigurinë e brendshme të institucionit nga ana e Kanushit në krye të SHISH nuk mbarojnë me kaq. Duket se kushti i sigurisë nuk është prioritet për të, pasi vazhdojnë të ushtrojnë detyra të larta edhe punonjës të tjerë, familjarë shumë të afërt të të cilëve janë shkarkuar nga institucionet e Vetting-ut për mos-justifikim të pasurisë. Sipas legjislacionit të SHISH është taksative që familjarët e personave të shkarkuar nga Vetting-u nuk plotësojnë kushtin e sigurisë, dhe si pasojnë nuk mund të vazhdojnë të jenë të punësuara në institucion.

Shkeljet e rënda ligjore të drejtorit të komanduar të SHISH e bëjnë atë subjekt të ndjekjes penale, duke komplikuar akoma më tepër situatën kaotike në institucion, pasi fillimi i ndjekjes penale ndaj tij çon automatikisht pezullimin e tij nga puna deri në përfundimin e çështjes, duke e lënë institucionin pa drejtues.

Në fund të vitit të shkuar në media u publikua përplasja midis ish-drejtorit në detyrë Bendo dhe Kanushit. Lideri i opozitës Berisha reagoi në mënyrë të ashpër ndaj këtij skandali duke u shprehur se ‘Informoj shqiptarët se në dhunim flagrant të Kushtetutës së vendit, në një akt mafioz të pashembullt, shefit të shërbimit informativ, të emëruar në përputhje me Kushtetutën e vendit nga Presidenti i Republikës, të dërguar për shkollim në SHBA, pas kthimit nga shkollimi në kundërshtim me ligji, i mbyllen dyert e shërbimit dhe nuk i lejohet të marrë detyrën, pa asnjë akt, pa asnjë vendim, të atij që supozohet të jetë kryetar shteti, dhe që mbron firmën e institucionit. Shefi i shërbimit informativ kombëtar, propozohet nga kryeministri, por emërohet nga presidenti, dhe po me ligj, ai u raporton të dyve. Ky është një akt i turpshëm, që dëshmon se këtu nuk ka shtet, por ka vetëm një njeri që nuk njeh ligj, Kushtetutë dhe parim dhe ky është Edi Rama’

Sipas Berishës, Oljan Kanushi ka marrë shërbimin si një militant i verbër, dhe ka si porosi që të mos komunikojë me partnerët, duke shtuar ‘Unë ju kam informuar që Kanushi që ka dërguar Edi Rama nga enturazhi i tij më i ngushtë, nuk ka punuar një ditë të vetme. Nuk ka qenë as informator. Dhe merr shërbimin si një militant i verbër. Me dy porosi, e para që do lartësohesh në detyrë nëse nuk komunikon me partnerët.

Është absolutisht e vërtetë kjo. Nuk ka ndodhur kurrë, një porosi e tillë nuk është dhënë kurrë. Pa komunikim me partnerët, shërbimi është larg çdo mundësie për të përmbushur objektivat e tij për sigurinë kombëtare. Shërbimi informativ nuk ka fuqi imponimi të ligjit. Është thjesht mbledhës informacioni, sepse të atillë e ka përcaktuar ligjvënësi.

Edi Rama u kërkon që çdo bashkëpunim me shërbimet partnere, të kalojë direkt nga Edi Rama. Po sikur të na e çojë në Beograd këtë bashkëpunim Edi Rama?’.