Kryetari demokrat, Sali Berisha, deklaroi nga Durrësi se Partia Demokratike dhe Shqipëria është përpara në një revolucion të dytë për shkak se vendi është në një monizëm më të thellë se ai i vitit 1991.

Berisha tha se PD kaloi një vit të pashembullt, ku pati përpjekje për asgjësimin e saj. Por Berisha tha se ajo sot është më e sigurt se kurrë drejt fitores.

Duke theksuar se Igli Cara do jetë kryebashkiak i ri i Durrësit, Berisha tha se duhet të punojnë për fitoren e tij.

“Jemi në një revolucion të dytë. Kemi lirinë dhe idealet tona. Si misionarë, ne jemi të pamposhtur. Të vetmit që i hyjnë detit në këmbë dhe e kalojnë janë misionarët dhe ne të tillë jemi.

Sot na duhet më shumë se kurrë, të jemi në protestë, të jemi në fushatë, të jemi kudo. Të vazhdojmë betejën tonë për të përmbysur këtë monizëm të urryer të Edi Ramës. Asgjë nuk na ndalon ne. Sot jemi më të fuqishëm se kurrë.

Ndaj sot ju ftoj që të vazhdojmë këtë betejë të një rëndësie të jashtëzakonshme për kombin dhe vendin. Të punojmë për fitoren e Igli Carës, për fitoren e Durrësit.

Mbyllini sytë për një moment, çfarë na del përpara, beton dhe vetëm beton, mafie dhe vetëm mafie. Po kush do fitojë, ajo apo ne? Ne do fitojmë.

Sot e vetmja shpresë jemi ne dhe kjo është gjëja e jashtëzakonshme. Kjo na mbush me frymëzim, na mbush me energji, na shumëfishon forcën për të justifikuar këtë besim të jashtëzakonshëm.

Ndaj të bashkohemi dhe të vazhdojmë betejën tonë. Të bashkohemi me njëri-tjetrin, të bashkohemi me qytetarët. T’i lëmë ata që kanë vënë veten në dispozicion të Edi Ramës të shkelmojnë mbi veten e tyre dinjitetin e tyre. Zgjedhje fatale, por PD është ngritur dhe prapë do shkojë e sigurt drejt fitores,” tha Berisha.