Ja, iku data 25 prill e kampet janë jo në dhënie dore e përgëzim të fituesit, por në përplasje akuzash. Një palë bërtet, fitova. Kundërshtari ia pret, i vodhe. E siç duket s’do ketë melhem ta zbusë këtë gjendje. Vendi edhe pa zgjedhjet qe i mbarsur me konflikt të ashpër.

Tani po shkohet drejt përplasjes me sa duket. Ndihmon dhe vendimi i Kushtetueses që për protesta nuk merret më lejë, veç njoftohet policia.

Edi Rama, që e kupton se ç’do sjellë e nesërmja, sidomos në ekonomi, pra arka e shtetit do jetë bosh, ka nisur miklimin e opozitës me bashkëqeverisje. Që të shuajë masakrën elektorale, por edhe të jetë i mbrojtur në sulmin fiskal që pritet ta nisë andej nga shtatori a tetori.

Në krahun e opozitës vihet re një mërziti e ligjshme dhe një revoltë e shpjegueshme. Këtij zjarri i hedhin benzinë plot të mllefosur që u erdhi çasti të lajnë inatet personale që kanë me Bashën. Sigurisht që kjo grindje i konvenon Ramës për ta mbyllur shpejt e me sa më pak dëme procesin zgjedhor. Shkurt, u zhvillua një lojë ku pala qeverisëse u suall sipas shprehjes, topi është i im, penalltinë e gjuaj unë.

U duk sikur ky skenar do kalonte fjollë, ashtu siç di t’i qëndisë Edi Rama, që çdo përdhosje që i bën ligjit u vendos sipër ambasadorët si qershi mbi tortë. Ata me shprehje shkruar nga dora e tij flasin sikur të jenë në Kongresin  PS-së. Dhe do qe kaluar lumi, por ca fakte të ditëve të fundit po tregojnë se zullumit në komisionet e votimit iu shtua pika e fundit e tani nisi rrjedhja drejt besimit se jo vetëm ka vjedhje votash, por ato qenë të mirëmenduara e të planifikuara. Pra provohet që PS kishte strategji për të grabitur sa më shumë vota.

Nuk e kemi fjalën vetëm,

1-Te rezultati hipotetik që PS fitoka 74 mandate. Duket absurde që veç kjo parti në glob merr po aq deputetë sa kishte 8 vite më parë, ndonëse pati një qeverisje mizerje!!!

2-Te tre deputetët e Doshit që jo vetëm s’pati program, po as një xhiro nuk bëri në Shqipëri.

3-Te dy deputetët e Qifes,ose ‘Dy Qiftarët’, siç i quan populli.

4-Te 120 milionë eurot që Qeveria shpërndahu në llogaritë e hallexhinjve,apo punësimet sezonale e deri lejet e legalizimeve.

E kemi fjalën te 85 mijë fletët e votimit të pavlefshme që u bënë të tilla me urdhër partie. Ato përfaqësojnë 7-8 deputetë që i fshiu një stilolaps i thjeshtë e po kaq mandate i rrëmbeu qeveria me kodin zgjedhor të njëanshëm. Ka plot video ku komisionierë të ndryshëm, si vrasës me pagesë, asgjësuan vullnetin e popullit. Ishin kaq gjakftohtë e kaq të qetë sa dukeshin si robotë jo si njerëz që shkatërruan të ardhmen e fëmijëve të tyre më së paku. Atje ku ata e dinin aq mirë vinin një kryq e kështu zeronin bindjet e kundërshtarëve. Janë pamje revoltuese, të dhimbshme që nxjerrin açik masakrën socialiste në zgjedhje.

Kjo parti kur mbante emrin Parti Komuniste apo Parti e Punës e shpallte hapur që ‘Pushteti buron nga gryka e pushkës.’ Tani janë ‘rinovuar’ dhe kanë përparuar. Kanë slogan të ri: ‘Pushteti buron nga gryka e...stilolapsit.’ Kështu shfaqen më të emancipuar dhe më të kohës. Ama e vranë procesin zgjedhor dhe nuk dihet se kur mbi tokën  e shqipove do të vijë besimi te vota e lirë.

Rama sot feston, Basha sot akuzon, populli dje, sot, nesër emigron...