Lawrence Faucette, personi i dytë që mori zemrën e një derri përmes një procedure transplantimi, ka vdekur gjashtë javë pas procedurës.

Sipas Qendrës Mjekësore të Universitetit të Maryland, zemra filloi të shfaqte shenja refuzimi ditët e fundit.

CNN raporton se dëshira e fundit e Faucette ishte që spitali të shfrytëzonte sa më shumë përvojën, në mënyrë që t'u garantonte të tjerëve një shans për një zemër të re kur një organ njerëzor nuk është i disponueshëm.

"Ai më pas i tha ekipit të mjekëve dhe infermierëve që u mblodhën rreth tij se ai na donte. Do të na mungojë jashtëzakonisht shumë," tha Dr Bartley Griffith, drejtor klinik i Programit të Xenotransplantacionit Kardiak në Shkollën e Mjekësisë të Universitetit të Maryland.

58-vjeçari u pranua për herë të parë në UMMC më 14 shtator, për shkak të simptomave të dështimit të zemrës. Ai iu nënshtrua transplantit eksperimental gjashtë ditë më vonë.

"Shpresa ime e vetme e vërtetë që ka mbetur është të shkoj me zemrën e derrit, ksenotransplantin," i tha Faucette në spital në një intervistë të brendshme disa ditë para operacionit.

Sipas mjekëve, ka pasur progres të dukshëm gjatë javëve që pasuan menjëherë transplantin, madje ai ka kryer terapi fizike dhe ka kaluar kohë me familjen e tij.

Faucette ishte në trajtim eksperimental me antitrupa për të shtypur më tej sistemin imunitar dhe për të parandaluar refuzimin. Sidoqoftë, refuzimi i organeve është "sfida më e rëndësishme me transplantet tradicionale që përfshijnë edhe organe njerëzore", tha UMMC.

Gruaja e Faucette falënderoi ata që janë përfshirë në kujdesin e burrit të saj në UMMC.

“Larry e filloi këtë udhëtim me një mendje të hapur dhe besim të plotë te Dr. Griffith dhe stafi i tij. Ai e dinte se koha e tij me ne ishte e shkurtër dhe ky ishte shansi i tij i fundit për të bërë për të tjerët, "tha ajo.