Zbulohet mega-plantacioni i drogës me teknologji të lartë/ Goditet banda shqiptaro-spanjolle, pati përplasje me armë

RADIO VALENCIA

Agjentët e Policisë Kombëtare spanjolle kanë shkatërruar një organizatë kriminale të specializuar në kultivimin e marihuanës në ambiente të mbyllura (indoor) në zona të ndryshme të Komunitetit të Valencias. Operacioni ka çuar në arrestimin e 14 personave dhe sekuestrimin e 3 mijë bimëve, si dhe të disa armëve.

Pas shtatë kontrolleve të njëkohshme në zonat Benifaió, Alginet, Benaguasil, Serra, La Pobla de Farnals dhe Moncofa, policia ka çmontuar tre plantacione indoor, ndër të cilat një mega-plantacion me teknologji të avancuar me 2.763 bimë në fazë të avancuar rritjeje. Tre nga të arrestuarit janë futur në paraburgim.

Hetimi nisi në muajin janar, pasi u zbuluan disa shtetas shqiptarë që transportonin pajisje për instalime indoor në Xirivella. Hetuesit e Komisariatit Lokal të Policisë Kombëtare në Xirivella-Aldaia-Alaquàs konstatuan se të dyshuarit ishin hetuar edhe më parë, në vitin 2023, nga njësi të tjera policore, ndaj grupi kriminal kishte marrë masa të shumta sigurie.

Konkretisht, ata përdornin automjete me qira, të cilat i ndërronin shpesh, zëvendësonin personat përgjegjës për plantacionet dhe largoheshin rregullisht nga vendi. Gjithashtu kryenin udhëtime të vazhdueshme nga Murcia deri në Girona, me synim zgjerimin e aktivitetit dhe gjetjen e ambienteve të reja për kultivim.

Hetimi zbuloi gjithashtu se drejtuesit e organizatës jetonin në zona me standard të lartë ekonomik. Kreu i grupit banonte në një vilë të madhe në Serra, ndërsa dy përgjegjësit e tij ishin vendosur në zona turistike të La Pobla de Farnals dhe Moncofa. Në nivelin më të ulët të hierarkisë, punëtorët ose “rojet” jetonin në qendrat e prodhimit në kushte shumë të këqija banimi.

Fraksioni shqiptar i lidhur me një grup spanjoll

Përmes vëzhgimeve dhe ndjekjeve policore, u zbulua se fraksioni shqiptar ishte bashkuar me një grup shtetasish spanjollë me precedentë për trafik droge.

Të dy grupet, me një ndarje të qartë rolesh, kishin krijuar një lloj “joint venture” kriminale – një bashkëpunim strategjik për të bashkuar burimet, teknologjinë dhe kapitalin, me qëllim maksimizimin e fitimeve dhe ndarjen e rreziqeve e kostove.

Hetimi i Policisë Kombëtare çoi në lokalizimin e disa pikave të prodhimit: një magazinë industriale në Benifaió, një depo në Llíria, dy banesa në Benaguasil, ku mbahej droga, dhe një vilë në Alginet.

Përplasje me armë mes bandave

Gjatë fundjavës së 4 korrikut, në plantacionin e Llíria-s ndodhi një “vjedhje e ngarkesës” (vuelco) – pra grabitje droge mes grupeve rivale – ku dyshohet se janë përdorur armë zjarri.

Për këtë arsye, patrullat e Gardës Civile shkuan në vendngjarje dhe gjetën një plantacion marihuane me 450 bimë, me peshë totale rreth 380 kilogramë.

Gjithashtu u gjetën gëzhoja municioni 9 mm, por nuk u gjet asnjë person në vend.

Për shkak të rrezikut që të dyshuarit të arratiseshin ose të fillonin hakmarrje mes organizatave rivale, policia vendosi të përshpejtonte kontrollet e planifikuara.

Shtatë bastisje të njëkohësishme

Si rezultat i shtatë operacioneve të njëkohshme, u arrestuan 14 persona dhe u shkatërruan: tre plantacione indoor, një prej tyre një super-plantacion me infrastrukturë teknologjike të avancuar, ku u gjetën 2.763 bimë në fazë të avancuar rritjeje.

Gjithashtu u çmontua edhe ambienti i përdorur si depo magazinimi dhe plantacioni i zbuluar më parë në Llíria.

Policia sekuestroi: rreth 3.000 bimë marihuane, 12.000 fidanë, 30 kilogramë sytha marihuane gati për shpërndarje, 11 gramë kokainë, 87.800 euro para cash, dy armë me ajër, dy automjete të përdorura për logjistikën e rrjetit, dhe materiale të ndryshme për kultivimin e drogës.

Operacioni u mbështet nga Grupi Operacional Special i Sigurisë (GOES), Njësia e Ndërhyrjes Policore (UIP), Njësia e Parandalimit dhe Reagimit (UPR), njësia ajrore dhe njësitë me qen të Policisë së Lartë të Komunitetit të Valencias.

Të 14 të arrestuarit u dërguan para gjykatës si të dyshuar për:

krime kundër shëndetit publik (trafik droge), vjedhje të energjisë elektrike, dhe pjesëmarrje në grup kriminal.

Për tre prej tyre u vendos paraburgimi. Njëri prej të arrestuarve kishte edhe një urdhër të mëparshëm gjykate për futje në burg për të njëjtën çështje.