Një bandë përballet me dënime deri në katër vite burg, pasi u kap me dy plantacione kanabisi në Herent dhe Haacht, Belgjikë. Në total, ata kishin kultivuar gati 500 bimë, me një fitim të vlerësuar prej rreth 200 mijë eurosh. Ironikisht, ata u zbuluan për shkak të borës që shkrihej shumë shpejt mbi çati.

Policia bastisi një shtëpi në Mechelsesteenëeg në Herent më 4 korrik 2023, pas dyshimeve të gjata për aktivitet të paligjshëm. Qysh në mars, hetuesit kishin vënë re një rritje të papritur të konsumit të energjisë, dritë të forta në shtëpi dhe lëvizje të dyshimta me thasë plastike.

Në pranverë, policia vendosi të kryente vëzhgime nga afër dhe konstatoi se shumë njerëz hynin e dilnin për pak minuta. Por ajo që i bëri hetuesit të veprojnë ishte një detaj i pazakontë: bora mbi çatinë e shtëpisë shkrihej më shpejt se në shtëpitë e tjera përreth, një shenjë e qartë e nxehtësisë së lartë që vinte nga llambat e forta të përdorura për kultivimin e kanabisit.

Gjatë bastisjes në verë, dyshimet u konfirmuan. Në hambarin e shtëpisë, policia gjeti dy plantacione të korrura.

‘Njëra kishte 363 vazo, tjetra 119,’ deklaroi prokurori.

‘Janë bërë dy cikle kultivimi, secili me mbi 23 kilogramë kanabis, që u shitën për gjithsej 196.656 euro.’

Gruaja dhe djali i saj, që jetonin në shtëpi, pranuan se kishin dhënë hambarin me qira një shtetasi shqiptar, i cili- sipas tyre -e kishte përdorur ‘pa dijeninë e tyre’ për të mbjellë kanabis. Ata kishin marrë 5.500 euro për këtë, por tani rrezikojnë nga një vit burg secili dhe 8.000 euro gjobë.

Policia identifikoi më pas shqiptarin E.B., i cili pranoi se kanabisi ishte i tij, por pretendoi se ishte për përdorim vetjak. Hetuesit kontrolluan telefonin e tij dhe zbuluan fotografi të një plantacioni tjetër, këtë herë në Haacht, ku ai kishte paguar një burrë tjetër për të përdorur tavanin e shtëpisë si serë kanabisi.

E.B. ishte dënuar një vit më parë me 50 muaj burg me kusht për vepra të ngjashme me drogën. Ish-e dashura e tij, e cila rrezikon 30 muaj burg për bashkëpunim, ka deklaruar se ai tani ndodhet sërish në Shqipëri. Dhjetë vite më parë, ai ishte dënuar edhe për trafik njerëzish.

E.B. nuk u paraqit në gjyq, por rrezikon 50 muaj burg dhe 8.000 euro gjobë. Ai dhe ish-e dashura e tij do të duhet gjithashtu të kthejnë nga 46.000 euro secili, si pjesë e fitimit të paligjshëm.