Seanca e konkluzioneve të mbrojtjes për inceneratorin e Fierit, u kthye në një debat procedural, ku ish-deputeti socialist Alqi Bllako hodhi akuza të forta ndaj Prokurorisë së Posaçme.

Bllako tha se rikthimi tek akuzat fillestare nga ana e prokurorit, duke anashkaluar vendimin e gjyqtares paraprake, tregon se është orkestruar goditja e tij në kuadër të një agjende të caktuar.

Alqi Bllako pretendon se nuk ka qenë zyrtar i lartë publik, por funksionar i lartë civil, teksa paralajmëroi se shkeljet e konstatuara do t’i ankimojë në KLP dhe deri në Strasburg.

“Shkelja e ligjit është aq flagrante se nuk di nëse ka të bëjë me injorancën profesionale, apo një hakmarrje personale.

Kush konsiderohet funksionar i lartë shtetëror, e përcakton Kushtetuta. E ftova prokurorin në seancën paraprake të citonte një ligj të vetëm se ku bazohet, nuk dha sqarime sepse diçka e tillë nuk ekziston.

Është haptazi shpërdorimi i prokurorit, me qëllim hakmarrjen personale. Një atentat ndaj gjykatës paraprake. Një shkelje e tillë jo vetëm do ankimohet në KLP, por deri në Strasburg”, ka deklaruar Bllako.