Pas akuzave për përfshirje në vrasjen e një tregtari droge, i cili u qëllua në kokë në një distancë të afërt në një shtëpi në Hartlepool, një prej të dyshuarve shqiptar ka mohuar të jetë pjesë e komplotit.

Sipas fakteve të publikuara në gjyq, Dorian Pirija vizitoi shtëpinë në Charterhouse Street në ditët që i paraprin vrasjes së tregtarit kurd të kanabisit Hamawand Ali Hussain në shtator 2019.

Ai u pa gjithashtu duke blerë një sëpatë, thikë dhe materiale të tjera me një burrë tjetër në një B&Q në Middlesbrough më 5 shtator.

Por duke dhënë dëshmi në gjyqin e vrasjes në Teesside Crown Court, Pirija tha se artikujt ishin në lidhje me rritjen e kanabisit.

Ai tha se ishte në Middlesbrough gjithë ditën më 14 shtator kur Z. Hussain, 30-vjeç, u vra.

Thomas Kark QC, duke mbrojtur Pirijen, e pyeti atë: “A keni menduar se ndonjë prej sendeve të blera do të përdorej për të vrarë ndokënd?”

Pirija, 33 vjeç, i cili është grek-shqiptar, tha: “Sigurisht që jo”.

Pirija pranoi të shkonte në shtëpinë ku ndodhi krimi ku u takua me burra të tjerë më 12 dhe 13 shtator.

Ai tha: “Askush nuk më tha asgjë në atë kohë, por unë supozova se do të përdorej si një shtëpi kanabisi.” Pirija tha se ai ishte përfshirë në një shtëpi tjetër kanabisi në Middlesbrough.

Ai tha se nuk shkoi në Hartlepool ditën e vrasjes, duke thënë: “Unë isha në Middlesbrough gjithë ditën“.

Ai shtoi se nuk kishte ide se çfarë do të ndodhte në Hartlepool dhe mësoi për vdekjen e Z. Hussain kur u arrestua katër ditë më vonë.

Pirija, gjithashtu u pyet për një kërkim që ai bëri në telefonin e tij për një fluturim në drejtim të Greqisë më 12 tetor. Ai tha se kishte premtuar të vizitonte nënën e tij dhe mohoi se po përpiqej të largohej nga vendi.

Pirija mohon vrasjen së bashku me Noza Saffari, 39 vjeç, Anxhelo Xhaferi, 24 vjeç, dhe Qazim Marku, 24 vjeç. Gjyqi vazhdon./ Panorama/