Spanjollët marrin dhurata tradicionale pas triumfit në Botëror: Stadiume me emrat e tyre dhe... arka me domate

Fama pas një suksesi në Kupën e Botës mund të sjellë shumë shpërblime, por dy yjet e Spanjës, Fabian Ruiz dhe Gavi, morën një nga dhuratat më të pazakonta në karrierën e tyre.

Pas triumfit të “La Roja” në Botërorin 2026, dy mesfushorët u rikthyen në vendlindjen e tyre, Los Palacios y Villafranca në Andaluzi, ku u pritën si heronj nga qyteti me rreth 35 mijë banorë.

Në nder të kontributit të tyre në fitimin e trofeut, dy stadiumet ku Ruiz dhe Gavi nisën hapat e parë në futboll u riemëruan me emrat e tyre.

Stadiumi “Marismas” tashmë mban emrin “Fabian Ruiz”, ndërsa “San Sebastian” është quajtur “Pablo Paez Gavira Gavi”.

Por surprizat nuk përfunduan me kaq. Sipas traditës së veçantë të këtij qyteti, dy kampionët e botës morën edhe një dhuratë shumë të pazakontë: arka me domate në peshën e tyre trupore.

Fabian Ruiz dhe Gavi u fotografuan me gjithsej 150 kilogramë domate, të vendosura në arka të posaçme.

Një mënyrë simbolike për të nderuar heronjtë lokalë dhe për të promovuar një nga produktet më të njohura të zonës.

Kjo traditë nuk është e re. Edhe legjenda spanjolle Jesus Navas, pas triumfit në Kupën e Botës 2010 në Afrikën e Jugut, mori të njëjtën dhuratë: një stadium me emrin e tij dhe domate “Bombon Colorao” në peshën e tij.

Një mënyrë e pazakontë, por shumë karakteristike për të festuar lojtarët që shkruajnë historinë e futbollit spanjoll.