Shakaja e Roberto Baggio-s në finalen e Botërorit: Mendova se gjeta mënyrën për t’ua sjellë Kupën italianëve

Roberto Baggio ka zgjedhur humorin për të rikthyer në kujtesë një nga momentet më të dhimbshme të historisë së futbollit italian. Legjenda e “Axurrëve”, i pranishëm në Nju Jork si ambasador i FIFA-s për finalen e Kupës së Botës 2026 mes Spanjës dhe Argjentinës, publikoi një postim që u bë menjëherë viral në rrjetet sociale.

Ish-fantazisti italian pozoi me trofeun e Kupës së Botës, ndërsa kishte mbuluar një pjesë të fytyrës me një shall, duke u shfaqur sikur ishte “i maskuar” si hajdut.

“Pas 32 vitesh nga ai i famshmi 17 korrik 1994, mendova se më në fund kisha gjetur mënyrën për t’ua sjellë italianëve Kupën e Botës… Për topin e penalltisë së asaj finale ende nuk ka asnjë lajm”, shkroi Baggio me shaka në profilin e tij në Instagram.

Me këtë batutë, ai rikujtoi finalen e Botërorit 1994 në Shtetet e Bashkuara, kur Italia u mposht nga Brazili pas goditjeve të penalltive. Baggio, protagonist absolut i rrugëtimit të Italisë drejt finales, humbi penalltinë vendimtare duke e dërguar topin mbi traversë, një episod që mbeti një nga imazhet më të dhimbshme në historinë e futbollit italian.

Tri dekada më vonë, “Bishti Hyjnor” tregoi se di të buzëqeshë edhe për atë kujtim të hidhur, duke fituar simpatinë e tifozëve me një postim plot vetironi gjatë finales së Botërorit 2026.