Nga shitësi i qeseve plastike, te heroi që ndali Anglinë: Historia frymëzuese e portierit të Ganës

Benjamin Asare është shndërruar në një nga emrat më të përfolur të Kupës së Botës 2026.

Portieri i Ganës ishte vendimtar në barazimin 0-0 ndaj Anglisë, duke mbajtur të paprekur portën e skuadrës së tij dhe duke e afruar atë me kualifikimin në fazën tjetër.

Megjithatë, rrugëtimi i 33-vjeçarit drejt skenës më të madhe të futbollit ka qenë gjithçka tjetër veçse i lehtë.

Vetëm pak vite më parë, pak kush do ta imagjinonte se ai do të luante në Kupën e Botës.

Përpara se të bëhej futbollist profesionist, Asare punonte në profesione të ndryshme për të siguruar jetesën.

Ai ka shitur qese plastike, është trajnuar si zdrukthëtar dhe punëtor metali, ndërsa ka punuar edhe si konduktor autobusi.

Karriera e tij mori kthesë kur trajneri Ennor Walker vuri re talentin e tij dhe e afroi te klubi ganez Great Olympics.

Walker e mbështeti vazhdimisht, madje duke i paguar edhe shpenzimet e transportit.

Në moshën 28-vjeçare, Asare ishte pranë dorëzimit pasi theu këmbën dhe mungoi për një vit e gjysmë.

Mjekët i sugjeruan të hiqte dorë nga futbolli, por ai refuzoi të dorëzohej dhe u rikthye më i fortë.

Në vitin 2024 ai iu bashkua klubit të njohur Hearts of Oak, ndërsa vetëm në vitin 2025 mori ftesën e parë nga kombëtarja e Ganës.

Që atëherë, karriera e tij ka njohur vetëm ngritje.

Sot, Asare është një nga heronjtë e Ganës në Botërorin 2026. Përtej pritjeve në fushë, ai vazhdon të kujdeset për gjyshen e tij, duke treguar se suksesi nuk e ka ndryshuar karakterin e tij.

Tani portieri ganez synon të kurorëzojë historinë e tij të jashtëzakonshme me një kualifikim në fazën me eliminim direkt të Kupës së Botës.