Presidenti i FIFA-s, Gianni Infantino, ka mbrojtur vendimin për vendosjen e pushimeve të detyrueshme për hidratim gjatë ndeshjeve të Kupës së Botës 2026, duke theksuar se masa është marrë ekskluzivisht për të mbrojtur shëndetin e futbollistëve dhe nuk ka asnjë lidhje me interesa komerciale.

Në një intervistë për agjencinë spanjolle EFE, Infantino iu përgjigj kritikave të shumta nga trajnerë dhe lojtarë, të cilët kanë argumentuar se këto ndërprerje prishin ritmin e ndeshjeve.

“Arsyeja pse ekzistojnë këto pushime është qartësisht nxehtësia. Në një Botëror ku zhvillohen tetë ndeshje në 39 ditë, është e rëndësishme që lojtarët të kenë mundësinë të pushojnë dhe të hidratohen gjatë takimeve”, deklaroi kreu i FIFA-s.

Organizata që drejton futbollin botëror ka vendosur që në çdo pjesë loje të ketë një pushim prej tri minutash për hidratim, për shkak të temperaturave të larta që janë regjistruar në disa nga qytetet pritëse të turneut në Shtetet e Bashkuara, Meksikë dhe Kanada.

Infantino hodhi poshtë pretendimet se kjo masë është vendosur për arsye financiare apo reklamash.

“FIFA nuk fiton absolutisht asgjë nga kjo. Të gjitha kontratat publicitare ishin nënshkruar para se të merrej ky vendim. Nuk bëhet fjalë për ekonomi, por vetëm për aspektin sportiv dhe mbrojtjen e lojtarëve”, theksoi ai.

Një nga kritikët më të zëshëm të kësaj rregulloreje ka qenë trajneri i Uruguait, Marcelo Bielsa, i cili ka deklaruar se pushimet për hidratim nuk sjellin ndonjë përfitim real dhe ndërhyjnë në rrjedhën natyrale të ndeshjeve.

Megjithatë, Infantino argumentoi se rregulli duhet të zbatohet në të gjitha ndeshjet për të garantuar kushte të barabarta për çdo skuadër.

“Sikur pushimet të lejoheshin vetëm në ndeshjet me temperatura shumë të larta, disa trajnerë do të kishin mundësinë të korrigjonin aspektet taktike gjatë lojës, ndërsa të tjerët jo. Pikërisht për këtë arsye vendosëm që ato të zbatohen në çdo ndeshje”, shpjegoi presidenti i FIFA-s.

Debati mbi pushimet për hidratim vazhdon të mbetet i hapur gjatë Botërorit 2026, por FIFA duket e vendosur ta mbajë në fuqi këtë masë deri në fund të turneut.