Evropa Jugore po përballet me një valë të re zjarresh shkatërruese, ndërsa temperaturat ekstreme kanë përkeqësuar ndjeshëm situatën në disa vende të kontinentit. Spanja, Franca dhe rajone të tjera vijojnë të luftojnë me flakët, ndërsa autoritetet kanë urdhëruar evakuimin e rreth 30 mijë banorëve.

Në Spanjë, qeveria ka shpallur gjendjen e jashtëzakonshme në rajonin e Madridit dhe provincën e Ávilës, pasi zjarret dolën jashtë kontrollit gjatë valës së tretë të të nxehtit këtë verë. Temperaturat kanë arritur deri në 44.7 gradë Celsius, duke favorizuar përhapjen e shpejtë të flakëve.

Mijëra zjarrfikës, të mbështetur edhe nga njësitë ushtarake të emergjencës, janë angazhuar në terren për të vënë situatën nën kontroll, ndërsa shkencëtarët paralajmërojnë se ndryshimet klimatike po rrisin rrezikun e zjarreve gjithnjë e më shkatërruese.

Ekspertët e krahasojnë situatën me skenarë të ngjashëm me “Ferrin e Dantes”, duke paralajmëruar se valët ekstreme të të nxehtit mund të bëhen më të shpeshta dhe më intensive në vitet e ardhshme, nëse ngrohja globale vijon me ritmet aktuale.