Franca lufton zjarret e mëdha pyjore, ndërsa Evropa dërgon avionë për shuarjen e tyre

Zjarrfikësit francezë vazhduan të luftojnë disa zjarre të mëdha pyjore përgjatë bregdetit të Atlantikut dhe në jug të vendit, ndërsa presidenti Emmanuel Macron tha se partnerët evropianë po dërgonin avionë dhe helikopterë për të mbështetur përpjekjet.

"Situata mbetet nën një tension shumë të lartë përballë zjarreve që po shkatërrojnë vendin, veçanërisht në Gironde", shkroi Macron në platformën X herët të premten, duke iu referuar rajonit pranë Bordosë. Ai tha se Franca kishte kërkuar aktivizimin e mekanizmit të mbrojtjes civile të Bashkimit Evropian dhe se do të merrte mbështetje nga Kroacia, Portugalia, Republika Çeke dhe Sllovakia.

Zjarri më i rëndë po digjej pranë Bordosë, një rajon i njohur turistik, ku rreth 20.000 persona janë evakuuar nga kampingjet dhe resortet turistike që prej të mërkurës. Ende nuk është e qartë se kur do të mund të kthehen.

Zjarri ishte përhapur në 4.800 hektarë deri të enjten në mbrëmje, njoftoi prefektura e Bordosë, duke shtuar se situata mbetej e vështirë pasi flakët ishin ende shumë aktive. Rreth 800 zjarrfikës, 260 automjete, pesë avionë për shuarjen e zjarreve dhe një helikopter ishin angazhuar në operacion. Një zjarrfikës u plagos, por nuk janë raportuar lëndime të tjera të rënda.

Më herët gjatë javës, dy zjarrfikës humbën jetën gjatë përpjekjeve për të shuar një zjarr pranë aeroportit të Bordosë.

Temperatura deri në 39 gradë Celsius priteshin sërish në rajon gjatë së premtes.

Një tjetër zjarr pranë bregdetit të Atlantikut, në jug të Bordosë, shkatërroi 1.200 hektarë pasi një furgon shpërndarjeje mori flakë dhe zjarri u përhap në bimësi. Rreth 5.000 persona u evakuuan.

Në jug të Francës, një zjarr pyjor pranë Pontevès, në verilindje të Marsejës, u riaktivizua gjithashtu. Rreth 500 banorë u evakuuan si masë paraprake, ndërsa rreth 800 zjarrfikës, të mbështetur nga më shumë se 100 ushtarë, luftuan flakët.

Ministria franceze e Mbrojtjes tha se po përgatiste një avion transporti ushtarak Airbus A400M për operacione të shuarjes së zjarreve. Avioni është në gjendje të hedhë 20 tonë ujë dhe pritet të jetë gati brenda 10 ditësh./DPA News