Bashkimi Evropian ra dakord të mërkurën të godasë Rusinë me një raund të ri sanksionesh, të cilat për herë të parë vënë në shënjestër kompani në territorin e Kinës që dyshohen se kanë ndihmuar Kremlinin.

Sanksionet kanë një fokus të madh në luftimin e anashkalimit dhe ndjekin firmat në mbarë botën që akuzohen se i ofrojnë Rusisë teknologji të avancuar dhe mallra ushtarake të prodhuara në BE.

Kompani nga Turqia dhe Koreja e Veriut janë gjithashtu në listën e zezë.

Blloku ishte përpjekur më parë të ndëshkonte një pjesë të vogël të subjekteve me seli në Kinën kontinentale, por ankesat nga zyrtarët e Pekinit dhe rezervat nga disa shtete anëtare e penguan vendimin.

Lidhjet gjithnjë e më të ngushta midis Rusisë dhe Kinës përfundimisht i nxitën diplomatët në Bruksel t'i jepnin sërish shtysë idesë.

Tregtia Rusi-Kinë arriti një rekord prej më shumë se 240 miliardë dollarësh në vitin 2023, sipas shifrave doganore nga qeveria kineze. Shifra tejkalon lehtësisht objektivin prej 200 miliardë dollarësh të vendosur nga të dy vendet.

Gama e re e sanksioneve të BE-së, paketa e 13-të që nga shkurti 2022, synon gjithashtu institucionet e drejtuara nga Rusia për fëmijët që janë rrëmbyer nga Ukraina. Rrëmbimet e supozuara shkaktuan lëshimin e një urdhër arresti kundër Presidentit Vladimir Putin nga Gjykata Ndërkombëtare Kriminale, e cila e trajton akuzën si një krim lufte.

Miratimi i paketës ishte planifikuar qëllimisht që të përkonte me përvjetorin e dytë të luftës në Ukrainë. Procesi u ngadalësua nga Hungaria, e cila është e vendosur të parandalojë çdo kufizim që përfshin Rosatom - monopolin bërthamor të Rusisë.

Rosatom është kontraktori kryesor në zgjerimin e termocentralit bërthamor Paks, i cili furnizon mbi 50% të energjisë elektrike të Hungarisë.

Pavarësisht nga ngërçi, dënimet u miratuan tre ditë përpara afatit simbolik të vendosur për të shënuar dyvjetorin e pushtimit të Ukrainës nga Rusia.