Donald Trump tha se Joe Biden e ka lënë globin në "prag të Luftës së Tretë Botërore" pasi një sulm me dron në një bazë në Jordani vrau tre trupa amerikane.

Ish-presidenti e sulmoi pasardhësin e tij në një fjalimi pas incidentit të së dielës, për të cilin Shtëpia e Bardhë fajësoi militantët "të mbështetur nga Irani" që veprojnë në Lindjen e Mesme.

"Ky sulm i guximshëm ndaj Shteteve të Bashkuara është një tjetër pasojë e tmerrshme dhe tragjike e dobësisë dhe e dorëzimit të Joe Biden-it", tha Trump në një deklaratë.

"Tre vjet më parë, Irani ishte i dobët, i thyer dhe plotësisht nën kontroll. Falë politikës sime të presionit maksimal, regjimi iranian mezi mund të mblidhte dy dollarë bashkë për të financuar përfaqësuesit e tyre terroristë," shtoi ai.

Kandidati republikan akuzoi zotin Biden se i dha Iranit "miliarda dollarë", të cilat ai tha se ishin përdorur nga Teherani për të "përhapur gjakderdhje dhe masakër në të gjithë Lindjen e Mesme".

"Ky sulm nuk do të kishte ndodhur kurrë nëse unë do të isha president, madje s'do kishte asnjë shans - ashtu si sulmi i Hamasit i mbështetur nga Irani ndaj Izraelit nuk do të kishte ndodhur kurrë, lufta në Ukrainë nuk do të kishte ndodhur kurrë dhe ne do të kishim paqe në të gjithë botë", tha ai.

"Por tani jemi në prag të Luftës së Tretë Botërore", shtoi Trump.

"Kjo ditë e tmerrshme"

Si president, zoti Trump hoqi marrëveshjen bërthamore të Iranit që u negociua nga administrata Obama dhe rivendosi sanksionet ndaj Teheranit.

Ai akuzoi regjimin iranian se po negocionte me keqbesim dhe se nuk po tregone të vërtetën për programin e tij të armëve bërthamore.

"Kjo ditë e tmerrshme është edhe një provë më shumë se ne kemi nevojë për një kthim të menjëhershëm në paqe me anë të forcës, në mënyrë që të mos ketë më kaos, shkatërrim dhe humbje të jetëve të çmuara amerikane", tha Trump.

"Vendi ynë nuk mund të mbijetojë me Joe Biden si komandant të përgjithshëm."

Administrata e zotit Biden është përpjekur të qetësojë në mënyrë të qëndrueshme tensionin me Iranin që u përshkallëzua gjatë viteve të zotit Trump në Shtëpinë e Bardhë.

Vitin e kaluar, presidenti demokrat ra dakord për një marrëveshje 6 miliardë dollarësh për shkëmbimin e të burgosurve me Iranin, ku u liruan pesë shtetas amerikanë në këmbim të lirimit të iranianëve të mbajtur në SHBA dhe 6 miliardë dollarë fonde humanitare./The Telegraph - Syri.net