Rusia ka tërhequr dhjetëra aeroplanë luftarak nga vija e frontit në përgjigje të sulmeve të fundit ukrainase në një bazë të thellë ushtarake, ka njoftuar inteligjenca perëndimore.

Forcat ukrainase më 27 prill kanë sulmuar me dronë aeroportin Kushchyovskaya dhe dy rafineri nafte në Rusinë jugperëndimore.

Ministria britanike e Mbrojtjes tha se me gjasë ky sulm ‘ka kontribuar që rreth 40 aeroplanë rus të llojeve të ndryshme të largohen nga vijat e frontit dhe të shpërndahen në fusha të shumta ajrore të largëta’.

‘Ndikimi i kësaj nuk ka gjasa të jetë menjëherë i dukshëm ose dramatik. Megjithatë, Ukraina ka demonstruar aftësi për të goditur shumë më thellë Rusinë’, shkroi Mbretëria e Bashkuar në një përditësim të inteligjencës.

Siç raportohet, rezultate të tilla do të jenë fitore për Ukrainën e cila ka qenë e stresuar për mungesën e municioneve kritike, shkruan YahooNews.

Por, sulmi i prillit nuk ishte i pari që e detyroi Rusinë të zhvendosë asetet e saj.

Flota e Kievit ka sulmuar flotën e Moskës në Detin e Zi, duke e detyruar atë të shpërndajë anijet luftarake nga selia e saj në Krime në një qytet port përgjatë bregut jugperëndimor rus.

Ndryshe, Ministria britanike e Mbrojtjes ka njoftuar se gjatë sulmit të 27 prillit forcat ukrainase kanë shkatërruar një numër të madh të bombave rrëshqitëse ruse.

Bombat rrëshqitëse janë të vështira për t’u kapur sepse kanë kohë të shkurtra fluturimi, andaj shkatërrimi i një pjese të tyre, do të thotë avancim mjaft i madh për Ukrainën.