Rebelët Houthi në Jemen kanë thënë se nuk kanë ndërmend të shtojnë më tej sulmet e tyre ndaj anijeve në Detin e Kuq duke theksuar se synimi i tyre mbetet bllokimi i Izraelit dhe hakmarrja ndaj SHBA dhe Britanisë.

Zëdhënësi Mohammed Abdulsalam, i cili është gjithashtu kryenegociatori i grupit rebel në bisedimet e paqes mbi luftën civile dhjetëvjeçare të vendit, tha se grupi nuk kishte plane të godiste Arabinë Saudite dhe Emiratet e Bashkuara Arabe.

“Nuk duam që përshkallëzimi të zgjerohet, ky nuk është objektivi ynë”, tha ai.

Houthit e lidhur me Iranin, të cilët kontrollojnë shumicën e zonave të populluara të Jemenit, kanë sulmuar anijet e lidhura me Izraelin në Detin e Kuq që nga tetori, në atë që ata thonë se është një shfaqje solidariteti me Palestinën.