Nga Mark Galeotti, SPECTATOR

Nuk ishte fare në kohën e duhur për Krishtlindjet (të cilat tani Ukraina i feston më 25 dhjetor, pasi i ndryshoi nga kalendari ortodoks rus), por Kievi do të festojë ende sulmin e sotëm të suksesshëm me raketa ‘Storm Shadow’ mbi një anije zbarkimi në një port të Krimesë. Nuk ka armëpushim sezonal nga asnjëra palë në këtë konflikt gjithnjë e më të ashpër.

Novocherkassk, një anije zbarkuese e klasit Ropucha, ka pasur edhe në të shkuarën episode dramatike gjatë kësaj lufte. Në mars të vitit 2022, ajo u dëmtua nga granatimet ruse kur u ankorua në Berdyansk të Ukrainës së pushtuar jugore. Më vonë gjatë vitit, Novocherkassk, së bashku me anijen e saj simotër, Tsezar Kunikov, thuhet se u bllokua nga mungesa e pjesëve të këmbimit për shkak të sanksioneve.

Më 26 dhjetor, teksa ishte ankoruar në portin Feodosia të Krimesë, Novocherkassk duket se është goditur nga një numër raketash kruz ‘Storm Shadow’, të furnizuara nga Britania, të cilat u lëshuan nga dy bombardues ukrainas Su-24 (të cilët rusët pretendojnë se u qëlluan më pas). Moska ka konfirmuar se Novocherkassk është dëmtuar, por Kievi pretendon se është shkatërruar. Pamjet nga Feodosia tregojnë shpërthime të mëdha dhe zjarre.

Në një nivel, është legjitime të pyesim nëse kjo është një arritje e madhe. Nuk është hera e parë që porti Feodosia goditet dhe as humbja e një anije zbarkuese nuk është ushtarakisht vendimtare- duke pasur parasysh se ditët kur Rusia mund të kryente në mënyrë të besueshme operacione amfibe kundër objektivave ukrainas kanë kaluar prej kohësh. Këto anije të mëdha kanë ende një rol transportues- Kievi pretendon se Novocherkassk ishte i mbushur me dronë iranianë Shahed, megjithëse është e vështirë të kuptohet pse, pasi nuk kishte vizituar kohët e fundit porte të tjera dhe do të ishte një vend mjaft i palogjikshëm për ruajtje afatgjatë. Këto anije janë gjithashtu objektiva relativisht të lehta. Anija motër e Novocherkassk, Minsk, u godit në një sulm të ngjashëm, ndërsa ishte ankoruar në Sevastopol në shtator, për shembull. Megjithatë, ky sulm nga Ukraina është i rëndësishëm për tri arsye kryesore.

Para së gjithash, ka pasur sugjerime se Ukraina ishte furnizuar me raketa ‘Storm Shadows’ me rreze të shkurtër veprimi në përputhje me regjimin e kontrollit të armëve, që kufizon eksportin e raketave me një rreze veprimi që i kalon 190 milje. Por kjo goditje duket se konfirmon se Ukraina ka versionin më të aftë me një distancë prej 340 miljesh. Edhe pse nuk është e qartë se sa raketa të tilla me vlerë 2 milion sterlina ka Ukraina, ato do të vazhdojnë t’i japin Kievit një aftësi të fuqishme dhe me rreze të gjatë.

Së dyti, sulmi tregon se Kievi është i përkushtuar ndaj një strategjie për ta bërë okupimin e Krimesë sa më të paqëndrueshëm për Rusinë. Edhe nëse linjat mbrojtëse ruse do të thyheshin, një sulm i drejtpërdrejtë tokësor në gadishull do të ishte i përgjakshëm dhe i vështirë. Në vend të kësaj, modeli i duhur është çlirimi i Khersonit në nëntor të vitit 2022. Pasi dështoi një sulm atje, ukrainasit u përqendruan në izolimin e qytetit dhe goditjen e linjave të furnizimit, derisa gjeneralët e Vladimir Putinit ishin të bindur se nuk kishin zgjedhje tjetër veçse të tërhiqeshin.

Krimea nuk është Khersoni, për të qenë të sigurt, dhe do të duhej një situatë vërtet e rëndë për ta larguar Rusinë prej saj, jo vetëm sepse Putini ka të ngjarë që ta konsiderojë gadishullin politikisht ekzistencial. Megjithatë, të paktën për momentin, shansi më i mirë i Kievit për të rifituar Krimenë duket se është duke e bërë atë shumë të vështirë dhe të shtrenjtë për ta mbajtur. Sulmi në Feodosiya u llogarit jo vetëm për të dëmtuar asete specifike ushtarake, por edhe për të përhapur mesazhin se askund në gadishull nuk është më i sigurt nga veprimet e Ukrainës.

Në fund të fundit, luftërat janë operacione politike. Këto sulme nuk kanë për qëllim vetëm të nervozojnë Kremlinin, por ato synojnë gjithashtu të sigurojnë Ukrainën dhe aleatët e saj perëndimorë se ata kanë ende një momentum. Në një kohë kur Moska pretendon se ka pushtuar qytetin e diskutueshëm Maryinka; kur ministri ukrainas i mbrojtjes Rustem Umerov propozon uljen e moshës së mobilizimit ushtarak nga 27 në 25; dhe kur ka presion në rritje ndaj ukrainasve jashtë vendit për të dëgjuar thirrjet (Estonia madje është e gatshme për të dëbuar ata që shmangin thirrjet), është e qartë se ka nevojë për disa lajme të mira. Së bashku me pretendimet e fundit të presidentit Zelensky se tre avionë luftarakë të rinj rusë Su-34 janë rrëzuar (që nuk është konfirmuar ende), Novocherkassk gjithashtu përfaqëson diçka si një përpjekje për të inkurajuar ukrainasit dhe për të siguruar aleatët e lëkundur se lufta ia vlen ende.