Miliona euro janë mbledhur nga nisma që mbështet përpjekjet e Kievit për luftë. Një projekt çek po mbledh fonde kolektive për një "dhuratë për Putinin" që do të armatosë Kievin.

Deri më tani, nisma ka mbledhur 23 milionë euro nga më shumë se 188,000 donatorë për të blerë një tank, raketahedhës, sistem të pastrimit të minave, drone dhe municione për ushtrinë ukrainase, njofton Euronews.

Kjo vjen ndërsa frika rritet që Perëndimi po lodhet duke ofruar mbështetje për Kievin në luftën e tij kundër Rusisë. Donatorët e huaj kanë siguruar 8% të parave të mbledhura, me iniciativën e promovuar në gjashtë gjuhë. Faqja çeke shet gjithashtu bluza që tallen me presidentin rus dhe dhurata të tjera për të nxitur donatorët. I udhëhequr nga ish-redaktori televiziv Martin Ondracek, projekti synon të mbledhë para të mjaftueshme për të blerë një helikopter Black Hawk, me vlerë rreth 3.6 milionë euro.

"Ne duam t'i themi botës se Ukraina ka nevojë për këto gjëra," tha 53-vjeçari, duke shtuar se kjo ishte gjithashtu një përpjekje për të bërë "presion". Sipas tij, furnizimet e dorëzuara në Kiev nga mbledhësi i fondeve kanë pasur një efekt domino në qeveritë perëndimore. Tre muaj pasi nisma çeke financoi një tank për Ukrainën, Holanda dhe Danimarka nënshkruan një marrëveshje që ofronte dhjetë automjete të blinduara nga Republika Çeke për Kievin, shpjegoi ai.

“E njëjta gjë ndodhi pasi dërguam një sistem anti-dron”, shtoi Ondraceku. "Dhe ne e dimë se ushtria amerikane ka mijëra Black Hawk."

"Paratë vijnë më ngadalë"

Qeveria çeke i ka ofruar Ukrainës ndihmë të konsiderueshme humanitare dhe ushtarake, si dhe ka pritur rreth gjysmë milioni refugjatë ukrainas. Por kjo mbështetje po pakësohet. Ondracek ka frikë se vendet e Europës Perëndimore do të lodhen duke mbështetur Kievin dhe përpjekjet e tij për luftë.

“Ukraina është shumë larg tyre dhe ata nuk kanë ndonjë përvojë të tmerrshme historike me Rusinë”, tha ai. Kur ishte pjesë e Çekosllovakisë, Çekia përjetoi një shtypje të konsiderueshme politike, kufizime në liritë personale dhe vështirësi ekonomike kur u qeveris nga komunistët nën kontrollin e Moskës nga 1948-ta deri në 1989-ën. Donacioni minimal për fushatën është 1968 korona (80 €), duke iu referuar shtypjes së lëvizjes liberale të Pranverës së Pragës nga sovjetikët në vitin 1968.

"Dhuratë për Putinin" erdhi nga një fushatë financimi kolektiv e udhëhequr nga ambasada ukrainase në Pragë, e cila pati sukses të jashtëzakonshëm, duke mbledhur afro 2.3 milionë euro në fillimin e pushtimit rus të Ukrainës më 24 shkurt të vitit 2022.

Ritmi i donacioneve është ngadalësuar që atëherë. Pas tre ditëve të para të mbledhjes së fondeve për Black Hawk, llogaria është rreth 366,000 €. "Atmosfera brenda shoqërisë ka ndryshuar brenda një viti, paratë vijnë më ngadalë," tha Ondracek, duke shpresuar të mbledhë shumën e kërkuar për Black Hawk në 150 ditë.

Redaktori televiziv, i cili ka pritur një familje ukrainase në shtëpinë e tij të dytë që nga fillimi i luftës, ka vizituar disa herë Ukrainën. “Mezi pres të kthehem atje në fund të luftës, me gruan time, për një pushim të gjatë”, tha ai.