Ministri i Brendshëm francez Gerald Darmanin njoftoi gjithashtu se rreth 500 persona ishin arrestuar për vepra të tilla, 102 prej të cilëve janë të huaj.

Ministri i Brendshëm i Francës Gérald Darmanin thotë se më shumë se 1000 sulme antisemitike janë kryer në vend që nga fillimi i luftës Izrael-Hamas më 7 tetor, me qindra njerëz të arrestuar.

“Numri i akteve antisemitike ka shpërthyer”, tha ministri në një intervistë për France 2. Nga 486 personat e arrestuar, 102 ishin të huaj, shtoi ai.

Popullsia hebreje e Francës, e vlerësuar në më shumë se gjysmë milioni, është më e madhja në Evropë dhe e treta më e madhe në botë, pas Izraelit dhe SHBA-së.

Shefi i policisë së Parisit Laurent Nuñez tha të dielën se kishte pasur 257 akte antisemite vetëm në zonën metropolitane të Parisit, me 90 arrestime.

Ai tha se nuk ka asnjë profil tipik në lidhje me sulmet.

"Ne gjejmë nga të gjitha profilet, fëmijë të vegjël që thonë gjëra shumë serioze", por edhe "njerëz që janë më të rrënjosur në mbrojtjen e kauzës pro-palestineze dhe që dalin jashtë kontrollit".

Yjet e Davidit të pikturuar në muret e shtëpive të hebrenjve i ngjasonin mënyrës se si hebrenjtë u detyruan të mbanin yje gjatë regjimit nazist.

Në Lyon, një grua u godit me thikë në shtëpinë e saj këtë fundjavë në atë që po trajtohet si një sulm antisemitik nga prokurorët. Jeta e saj nuk është në rrezik dhe nuk ka të arrestuar.