Ndërkohë që dy vatra të nxehta konflikti kanë tërhequr vëmendjen më të madhe mediatike dhe politike në muajt e fundit, një “luftë e ftohtë” po zhvillohet në Lindjen e Largët.

Së fundmi, Presidenti amerikan, Joe Biden, ka miratuar një grant me vlerë 80 milionë dollarë për Tajvanin, që do të përdoret për të blerë pajisje ushtarake amerikane. Vendimi u kundërshtua fuqishëm nga Kina.

Edhe pse shuma nuk mund të duket e madhe - pasi sipas BBC, Tajvani ka porositur deri tani 14 miliardë dollarë armatime nga SHBA-ja - ajo tërhoqi vëmendjen për një arsye madhore. Ishte hera e parë në 40 vite që SHBA-ja i dhuroi para nga taksapaguesit amerikanë një shteti që zyrtarisht nuk e njeh.

E gjithë kjo u bë në kuadër të programit FMF - Financimi i Ushtrive të Huaja. Që prej nisjes së luftës në Ukrainë, vitin e kaluar, përmes këtij programi Kievit i janë dërguar ndihma ushtarake me vlerë 4 miliardë dollarë.

Gjithashtu, ai është përdorur për të dërguar miliarda të tjerë në Afganistan, Irak, Izrael dhe Egjipt, por kurrë një vendi që nuk është pjesë e Organizatës së Kombeve të Bashkuara.

Objektivi amerikan ka qenë armatimi i Tajvanit mjaftueshëm sa për t’u mbrojtur nga një pushtim i mundshëm kinez, por jo aq shumë sa për të destabilizuar marrëdhëniet mes Uashingtonit dhe Pekinit, sidomos në rrafshin ekonomik.

Por në dekadën e fundit, Kina ka rritur ndjeshëm praninë e saj ushtarake në ngushticën e Tajvanit dhe ka bërë që formula e vjetër të mos funksionojë më.

Wang Ting-yu, deputet i partisë në pushtet në Tajvan, thotë se 80 milionët mund të jenë vetëm “maja e një ajsbergu” shumë të madh. Për herë të parë që prej vitit 1970, Tajvani do të dërgojë dy batalione për stërvitje ushtarake në SHBA, ndërsa ndihma financiare për blerje armatimesh në 5 vitet e ardhshme mund të arrijë deri në 10 miliardë dollarë.

Megjithatë, kjo mund të mos mjaftojë. Për vite me radhë, Tajvani ka menduar se do të ishte shumë e rrezikshme për Kinën që ta pushtonte ishullin, kështu që forcat u përqendruan te marina dhe aviacioni. Ushtria është lënë pas dore dhe të rinjtë që rekrutohen i përshkruajnë stërvitjet më tepër si kamp veror.

Por tani, Kina ka marinën më të madhe në botë, ndërsa forcat e saj ajrore janë fuqizuar ndjeshëm. Ekspertët ushtarakë besojnë se në rast të një konflikti, marina dhe aviacioni ushtarak i Tajvanit do të shfaroseshin për vetëm 96 orë.

Kështu që, nën presionin e Uashingtonit, Tajvani po kërkon ta shndërrojë ishullin në një fortesë të pakalueshme. Të gjitha shpenzimet po orientohen te këmbësoria, në mënyrë që të jetë më e përgatitur për luftë mbrojtëse dhe përballje nëpër qytete me ushtrinë e mirëpërgatitur kineze.