NATO ka vendosur aeroplanë vëzhgimi në Lituani për të “monitoruar aktivitetin ushtarak rus pranë kufirit të aleancës”.

Kështu, sipas mediave të huaja,aeroplanët AWACS do të jenë në gjendje të “zbulojnë aeroplanë dhe raketa qindra kilometra larg”, duke thënë se ato janë një “aftësi kryesore paralajmëruese e hershme për NATO-n”.

“Lufta e agresionit të Rusisë kundër Ukrainës ka rritur fokusin tonë në mjedisin e sigurisë në rajonin e Detit Baltik”, tha zëdhënësi në detyrë i NATO-s, Dylan White.

Javën e kaluar, në vazhdën e sulmeve ruse të dronëve pranë territorit të NATO-s, SHBA vendosi katër aeroplanë luftarakë shtesë F-16 në Rumani për të përmirësuar misionin e ”policisë ajrore” të NATO-s.

Dhe lajmi vjen ndërsa Ukraina është e vendosur të rrisë industrinë e saj të brendshme të mbrojtjes përmes partneriteteve me prodhuesit perëndimorë të armëve, ka thënë Volodymyr Zelensky.

Duke folur në hapjen e Forumit Ndërkombëtar të Industrive të Mbrojtjes, presidenti ukrainas tha se sektori i mbrojtjes i vendit të tij duhet të shndërrohet në një “qendër të madhe ushtarake” ku mund të ndërtohen dhe riparohen pajisjet dhe armët ushtarake.

Ndërkohë, në fillim të kësaj jave, sekretari i përgjithshëm i NATO-s tha se aleanca ushtarake perëndimore kishte siguruar 2.4 miliardë euro kontrata për municione për të ndihmuar vendet aleate të rimbushin rezervat e tyre ndërsa ndihmonin Ukrainën.