Në kohën kur në Nju Jork po mbahet seanca e Asamblesë së Përgjithshme të Kombeve të Bashkuara, në të cilën përfaqësues të Rusisë dhe Ukrainës po marrin pjesë për herë të parë që nga fillimi i luftës, në Moskë bëri jehonë lajmi që i dha dhimbje koke Vladimir Putinit. . Gjegjësisht, media shtetërore ruse raportoi se kufizimet në eksportin e komponentëve kyç për mjetet ajrore pa pilot, të prezantuara nga qeveria kineze, e bëjnë të vështirë për Moskën prodhimin e dronëve ushtarakë, të cilët mund të pengojnë përpjekjet luftarake të Vladimir Putinit në Ukrainë, si dhe marrëdhëniet me homologun e tij kinez, Xi Jinping.

Rregulloret e reja kineze të prezantuara në fillim të muajit "e ndërlikuan seriozisht dërgimin e dronëve në Rusi dhe çuan në mungesa të komponentëve të shumtë, siç janë kamerat e imazhit termik", raportoi gazeta zyrtare e lidhur me Moskën Kommersant.

Në fund të gushtit, qeveria kineze njoftoi se po prezantonte kontrollet e eksportit për disa drone dhe pjesë të lidhura me to. Masat prekin gjithashtu pajisjet e komunikimit, motorët dhe lazerët e përdorur në drone, si dhe sistemet anti-drone.

Kufizimet vlejnë edhe për dronët komercialë të destinuar për përdorim ushtarak, si dhe dronët me kohë fluturimi më shumë se 30 minuta.

Kina është një nga prodhuesit kryesorë të dronëve në botë dhe ka mbajtur zyrtarisht një qëndrim neutral ndaj luftës në Ukrainë, por ruan marrëdhënie miqësore dhe diplomatike me Moskën.

Konflikti, i cili ka vazhduar për më shumë se një vit, ka nxitur zhvillimin e dronëve me "shpejtësi rrufe", thanë ekspertët për Newsweek. Të dyja palët në luftë përdorin gjerësisht lloje të ndryshme të dronëve, duke përfshirë dronët e zbulimit dhe sulmit.

Ukraina publikon shpesh pamjet luftarake me dronë dhe sulme ajrore të profilit të lartë në territorin rus, si dhe sulme me dron detar ndaj objektivave ruse në Krime .

"Ukraina, pas përfundimit të luftës, do të ketë një përvojë unike dhe çdo mundësi për t'u bërë eksportuesi kryesor i mjeteve ajrore pa pilot në botë", tha Mykhailo Fedorov, zëvendëskryeministër i Ukrainës, në fillim të gushtit.

Në sulmet ndaj qyteteve dhe infrastrukturës së Ukrainës, Moska shpesh përdor drone, kryesisht dronë kamikaze të dizajnit iranian.

Samuel Bendet i Qendrës Amerikane për Analizat Detare, tha se ndalimi i Pekinit për eksportet e dronëve më të mëdhenj dhe disa nga komponentët e nevojshëm për ndërtimin e tyre është një temë e debatuar ashpër në qarqet e përfshira në prodhimin e dronëve në Moskë.

“Efekti i vërtetë i këtij ndalimi në tregun rus është kryesisht një rritje në çmimet e dronëve ekzistues dhe të disponueshëm kinezë që janë tashmë në Rusi”, tha Bendet.

Në planin afatgjatë, beson ai, industria vendase e dronëve të Rusisë mund të ndërhyjë dhe të zëvendësojë dronët kinezë.

“Është një shembull shumë interesant se si Kina pothuajse ka një monopol mbi teknologjinë që mundëson dronët”, tha eksperti britanik i dronëve Steve Wright.

Dronët kërkojnë "një sasi të madhe të pajisjeve elektronike", thotë Bendet, dhe pretendon se rusët janë përpjekur, por nuk kanë arritur të zhvillojnë aftësi të tilla brenda vendit.

Ai shtoi se kinezët kontrollojnë një pjesë të madhe të tregut, si për Rusinë ashtu edhe për vendet perëndimore.

“Ndalimi kinez nuk zbatohet aktualisht për dronët e vegjël DJI”, tha Bendet, duke iu referuar prodhuesit të një prej dronëve më të njohur të Kinës.

Megjithatë, ai theksoi se kufizimet e vendosura nga Pekini mund të ndikojnë në importet e dronëve bujqësorë më të mëdhenj dhe më të rëndë të përdorur nga Rusia në Ukrainë.

Mungesa e disa komponentëve mund të ketë pasoja të rëndësishme, por ka shumë rrugë alternative furnizimi, si ato ligjore ashtu edhe ato gri, që rusët përdorin për të marrë atë që u nevojitet.

Gjithashtu, shumë nga prodhuesit më të mëdhenj të dronëve kanë arritur të mbledhin rezerva të konsiderueshme të komponentëve për mjetet ajrore pa pilot në Rusi.