Duke iu drejtuar Samitit të BRICS, që po zhvillohet në Johannesburg të Afrikës së Jugut, Sekretari i Përgjithshëm i OKB, António Guterres, përgëzoi "rrugën e jashtëzakonshme të Kombit të Ylberit drejt unitetit përmes veprimit dhe drejtësisë", njofton UN News.

“Kjo është ajo që bota jonë ka nevojë: unitet për veprim dhe unitet për drejtësi; ne po përballemi me sfida ekzistenciale,” tha ai, duke tërhequr vëmendjen ndaj përkeqësimit të ndikimeve të ndryshimeve klimatike dhe rritjes së varfërisë, urisë dhe pabarazive.

Grupi BRICS i ekonomive botërore i përbërë nga Brazili, Rusia, India, Kina dhe Afrika e Jugut, i cili u bashkua në vitin 2010, përfaqëson më shumë se 40 për qind të popullsisë së botës dhe të pesë shtetet janë gjithashtu anëtarë të bllokut më të gjerë G20.

Z. Guterres vuri në pah rreziqet që vijnë nga teknologjitë në zhvillim pa një kornizë gjithëpërfshirëse globale, duke hedhur gjithashtu dritë mbi ndarjet dhe konfliktet gjeopolitike, veçanërisht ndikimet që rrjedhin nga pushtimi rus i Ukrainës.

"Botë multipolare"

Në fjalimin e tij, z. Guterres nënvizoi zhvendosjen globale drejt një bote shumëpolare, duke paralajmëruar se vetëm multipolariteti nuk mund të sigurojë një status quo paqësore dhe të drejtë. Ai bëri thirrje për institucione shumëpalëshe të fuqishme dhe efektive për të mbështetur këtë ndryshim.

Duke hequr paralele, ai theksoi mësimet nga fillimi i shekullit të 20-të, kur multipolariteti i Evropës pa mekanizma të fortë shumëpalësh kontribuoi në fillimin e Luftës së Parë Botërore.

“Ndërsa bashkësia globale lëviz drejt multipolaritetit, ne kemi nevojë të dëshpëruar – dhe unë e kam mbrojtur me forcë – për një arkitekturë shumëpalëshe të forcuar dhe të reformuar të bazuar në Kartën e OKB-së dhe ligjin ndërkombëtar”, tha zoti Guterres.

Duke vënë në dukje se strukturat e sotme të qeverisjes globale u krijuan pas Luftës së Dytë Botërore, duke përjashtuar shumë vende afrikane ende nën sundimin kolonial, ai theksoi domosdoshmërinë që këto institucione të pasqyrojnë dinamikën bashkëkohore të pushtetit dhe realitetet ekonomike.

Pa reforma, fragmentimi 'i pashmangshëm'

Shefi i OKB-së paralajmëroi se pa reforma të tilla, fragmentimi bëhet i pashmangshëm.

“Ne nuk mund të përballojmë një botë me një ekonomi globale dhe sistem financiar të ndarë; me strategji të ndryshme në teknologji, duke përfshirë inteligjencën artificiale; dhe me korniza kontradiktore të sigurisë,” tha ai.

Z. Guterres vazhdoi të vuri në dukje se vendet me të ardhura të ulëta, veçanërisht në Afrikë, do të mbanin peshën kryesore të ndikimit të një frakture të tillë.

Thirrje për veprim kolektiv

Z. Guterres përfundoi me një thirrje për veprim kolektiv, duke theksuar se njerëzimi nuk do të jetë në gjendje t'i zgjidhë problemet e tij të përbashkëta në mënyrë të fragmentuar.

"Së bashku, le të punojmë për të çuar përpara fuqinë e veprimit universal, domosdoshmërinë për drejtësi dhe premtimin për një të ardhme më të mirë."/ar.sh/SYRI.NET