Presidenti i Ukrainës, Volodymyr Zelensky është zotuar se Vladimir Putin do të vdesë si njeri i mposhtur.

Ai tha se forcat ruse e kuptojnë “thellë në zemrat e tyre” se nuk mund të fitojnë në Ukrainë dhe hodhi poshtë idenë se konflikti mund të zvarritet për dekada si disa nga luftërat e tjera të Kremlinit, shkruan Metro.

“Nuk mundet”, tha Zelensky për TV Globo të Brazilit. “Putini nuk do të jetojë aq shumë vite. Ai nuk luftoi në Siri me ritmin që po lufton me ne. Kjo është arsyeja pse ai nuk do të qëndrojë 30 vjet. Ai nuk do të qëndrojë, do të vdesë. Padyshim”.

I pari i shtetit ukrainas parashikoi se lideri rus do të vdes maksimalisht brenda dhjetë vjetëve.

Lideri ukrainas tha se veprimet e trupave ruse tregojnë se ata “nuk janë në gjendje të pushtojnë plotësisht Ukrainën dhe të na shkatërrojnë”

“Ata ishin të aftë në fillim”, vazhdoi presidenti. “Ata menduan se do të na pushtonin. Por, ne bëmë diçka brenda dhe nga jashtë shteti, e cila na mundësoi të bëheshim më të fortë se ata”.

Duke u zotuar se do t'i rezistojë çdo oferte të Rusisë - tani ose në të ardhmen - për të rigrupuar dhe nënshtruar vendin e tij, ai tha: "Për sa kohë që jemi gjallë, ne nuk do t'i lejojmë ata të bëhen aq të fortë sa ishin."

Komentet e Zelensky erdhën pasi raketat ruse goditën edhe një herë qytetin e tij të lindjes në Ukrainën qendrore, duke vrarë gjashtë persona, përfshirë një vajzë 10-vjeçare dhe nënën e saj .

Sulmi ndodhi një ditë pasi presidenti ukrainas paralajmëroi se lufta po kthehet në Rusi.