Rusia “nuk duhet të jetë” anëtare e përhershme e Këshillit të Sigurimit të Kombeve të Bashkuara, tha të enjten një diplomate amerikane.

"Rusia është një anëtare e përhershme e Këshillit të Sigurimit. Nuk duhet të jetë kështu për shkak të asaj që po bën në Ukrainë," tha ambasadorja e Shteteve të Bashkuara në OKB Linda Thomas-Greenfield.

Megjithatë, karta e OKB-së "nuk e lejon ndryshimin e statusit të saj si një anëtare e përhershme", shtoi ajo.

Këshilli i Sigurimit i OKB-së është një organ ndërkombëtar përgjegjës për ruajtjen e paqes.

Ankesat nga vendet mund të paraqiten para tij, me votim të këshillit dhe marrjen e vendimeve për çështjet e sigurisë që anëtarët e tjerë të OKB-së janë të detyruar t'i ndjekin.

Ai ka 10 anëtarë me rotacion dhe pesë anëtarë të përhershëm, duke përfshirë Rusinë, Britaninë e Madhe, Francën, SHBA-në dhe Kinën që kanë të drejtën e vetos.

Moska do të marrë përsipër organin ekzekutiv duke filluar nga e shtuna për një muaj, duke zëvendësuar Mozambikun.

Thomas-Greenfield i tha AFP se pret që Rusia të sillet "profesionalisht" në presidencë, megjithëse  kishte dyshimet e veta.

“Ne gjithashtu e presim që ata të kërkojnë mundësi edhe për të çuar përpara fushatën e tyre të dezinformimit kundër Ukrainës, të Shteteve të Bashkuara dhe të gjithë aleatëve tanë”, tha ambasadorja amerikane.

"Në çdo rast, ne do të ngremë shqetësimet tona për veprimet e Rusisë," shtoi ajo, duke përsëritur dënimin që i ka bërë Uashingtoni "krimeve të luftës dhe shkeljeve të të drejtave të njeriut që ata po kryejnë" në Ukrainë.

Moska është akuzuar për vënien në shënjestër të civilëve dhe kryerjen e mizorive kundër civilëve ukrainas, gjë që nuk e pranon.

Thomas-Greenfield theksoi se Shtetet e Bashkuara do të dënojnë veprimet e Rusisë dhe do t'i bëjnë të ditur botës "çfarë po bën Rusia dhe pasojat e veprimeve të saj kundër Ukrainës".

Që nga shpërthimi i luftës në shkurt, tensionet midis Rusisë dhe SHBA-së janë shfaqur në këtë organizatë ndërkombëtare.

Në tetor, Asambleja e Përgjithshme e OKB-së votoi me shumicë dërrmuese në favor të dënimit të aneksimit të paligjshëm nga Rusia të katër rajoneve të Ukrainës, me 143 shtete që e mbështetën mocionin dhe pesë që e refuzuan atë.

Megjithatë, pati 35 abstenime, duke reflektuar ambivalencën ndaj palëve ndërluftuese midis shumë shteteve në mbarë botën.