Partia Socialiste ka fituar zgjedhjet parlamentare duke siguruar 74 mandate, sipas të dhënave paraprake të Komisionit Qendror të Zgjedhjeve.
E dyta në këto zgjedhje u rendit Partia Demokratike duke siguruar 43 mandate deputetësh, ndërsa e treta LSI me 19 mandate. PDIU siguroi 3 mandate. Ndërsa PSD 1, në Shkodër, duke bërë që Tom Doshi të zgjidhet sërish deputet.
Mandatet
Në këto zgjedhje nuk kishte koalicione ashtu si në parlamentaret e vitit 2013. Për nga numri i mandateve, PS shënoi një rritje në krahasim me zgjedhjet e fundit parlamentare. Po ashtu, edhe LSI. E vetmja parti e madhe që ka shënuar rënie, është PD.
PS mori 74 mandate, nga 65 në zgjedhjet e 2013-ës, duke u rritur me 9 mandate.
PD mori 43 mandate, nga 50 në zgjedhjet e 2013-ës, duke rënë me 7 mandate.
LSI mori 19 mandate, nga 16 në zgjedhjet e 2013-ës, duke u rritur me 3 mandate.
Numri i votave
Ashtu si mandatet e fituara, Partia Socialiste shënoi numrin më të madh rritjes së votave në të gjithë Shqipërinë, në këto zgjedhje parlamentare. Edhe LSI shënoi rritje, ndërsa votat e PD-së u tkurrën.
Në vitin 2013 PS mori 713.407 vota në të gjithë Shqipërinë, ndërsa në 2017-ën 763.999 vota. Pra 50.592 vota më shumë.
LSI arkëtoi 180.470 vota në vitin 2013 në të gjithë vendin, ndërsa këtë vit 225.678 vota, duke rritur elektoratin e saj me 45.208 vota.
Ndërsa, Partia Demokratike ka njohur tkurrje të elektoratit në krahasim me parlamentaret 2013. Atë vit, 528.373 vota shkuan për PD-në, ndërsa në këto zgjedhje, PD u votua 455.481 herë. Partia më e madhe opozitare njohu kështu një reduktim elektorati me 72.892 vota.
*Krahasimi është bërë duke iu referuar të dhënave zyrtare të KQZ-së për zgjedhjet Parlamentare të vitit 2013 dhe të dhënave paraprake të KQZ-së për zgjedhjet e 2017-ës për: PD, PS, LSI.
/SYRI.net/
© SYRI.net